股海實戰：達芙妮靜候調整再翻兜

假期氣氛轉濃，加上A股休市令中資股缺乏方向，港股尋日先升後跌，成交降至只有456億元，由於聽日又係假期，投資者要有心理準備，今日市況將會更加淡靜。尋日新地（00016）一度跌穿上周五復牌後嘅低位，走勢唔對辦，如今魚缸平貨何其多，何必偏要揀隻是非股嚟博？

上周五急跌嘅民企股旭光（00067）似乎真係「虛驚一場」，尋日股價反彈上全日高位1.73元，升幅24%，成交6.34億元，但技術上10日線行將失守50日線，即係話正醞釀死亡交叉利淡訊號，短線反彈未能重上1.8元，有機會再試低位承接，成功撈貨者，見好要識收！

昆能博財息兼收

上月九日阿莊講過昆侖能源（00135）可以逢低收集，結果當日見過低位12.9元後，股價便反覆回升，尋日見五十二周高位14.54元，收報14.18元，逆市升1.29%，已上車者可以繼續持有，阿莊尚未持貨，見呢期股仔冇咩好炒，與其長坐現金，都心郁郁買些少昆侖坐一坐，貪其有中石油（00857）撐腰唔怕關門大吉，加上公司派息每股0.22元將於五月十八日除淨，可以博財息兼收，計劃14元邊買入兩萬股。

內地消費促進月尋日正式展開，成效尚待觀察。講到內地消費，早前胡潤便與興業銀行聯合發表《二○一二年中國高淨值人群消費需求白皮書》，指中國個人資產喺600萬元人民幣以上嘅高淨值人群達到270萬人，平均年齡僅39歲，這說明為何近年中國消費市場吸引全球零售商嘅目光。

內地消費市場大有可為，但阿莊就認為，吸取近幾年體育用品股嘅經驗，零售商要打持久戰，就不應再側重喺鬥多分店，而應多花資源構建品牌及產品質素方面嘅優勢，建立一群忠實嘅長期顧客群，這樣才能做內地消費企業中嘅長青樹！

從事製銷鞋履及相關配飾業務嘅達芙妮（00210），除咗擁有自有品牌，還代理多個國際品牌，並兼營製造及出口業務，而除內地市場外，在台灣及香港市場均有知名度，其大中華消費概念獨特，另公司處於淨現金狀態，未來只要能妥善控制存貨及擴展銷售點嘅步伐，發展前景穩步向好。

去年末季以來，其股價累升六成多，且迭創五十二周高，期內表現跑贏同業及大市。現價往績市盈率十八倍計，換着喺大升市，估值算係便宜，但如今大市氣氛偏弱，前景更好，估值亦要回歸基本步。以其目前估值，呢轉升浪已有交代，次季部署，持貨若有利潤，建議逢高沽貨獲利，候季內調整考驗9.5元水平承接，再睇位翻兜。

Tip股我至Top

阿莊3/28Tip：

中海集運（02866）最多升9%

史提芬4/2Tip：

瑞聲科技（02018）最多升7%