樓市出更：商舖狂摸飆3倍

額外印花稅短時間內好難甩，唔少游資都寧願流入商舖市場，近月炒風仲愈來愈旺，有代理同劉Sir講，上個月舖位摸貨有25宗，金額超過3.2億元，兩數字都按月飆升三倍有多，而且摸售風氣亦開始蔓延到二線區，相信今季二線區售價升幅有一成，同頂尖零售區升幅可看齊。

農曆新年過後，唔少銀行都爭住做按揭，物業市場水浸，而商舖租金有支持，就自然受歡迎。聽美聯工商舖（00459）行政總裁黃漢成（Daniel）講，上月商舖成交勢如破竹，成個市場商舖買賣註冊量差唔多有536宗，按月多逾兩倍，金額近72億元，除按月多逾1.2倍外，仲係九七年樓市高峰期九月後新高。

荃灣觀塘舖價料升

Daniel話，上個月成交咁勁，主因係唔少資深投資者都出番嚟買賣，帶旺成個舖市，其中反映投資最熾熱嘅摸貨個案有25宗，涉及金額差唔多3.23億元，同二月時僅6宗與8,000萬元比較，多出逾三倍。

美聯旺舖董事盧展豪話，一線商舖業主惜售，所以投資者都落荃灣及觀塘等二線區睇舖，令二線商舖買賣註冊金額佔整體比例升到近73%，應該係歷史高位。預計第二季核心區商舖售價有半成至一成升幅，二線區商舖售價升幅都有一成。

紀惠九千萬掃信德

商舖租務方面，始終都係一線區最矚目，有代理講，有個意大利知名時裝品牌睇好未來高鐵效應，早前洽租尖沙咀海港城一個工程中嘅地下複式舖，面積大約一萬方呎，相信月租要1,000萬元。

投資者除買舖外，部分喜歡買寫字樓，美聯商業陳麗屏話，紀惠集團廖偉麟半個月內斥近9,000萬元掃入上環信德中心兩組單位，剛買咗東翼9樓15及16室，呎價逾1.4萬元，涉資4,100萬元。