牛熊對壘：中銀獲大行撐場吼16911

港股在上周五受到新地（00016）急挫影響低開，其他地產股一同受累，恒指一度跌至近21,300點水平，惟跌幅午後大為收窄，埋單計數只下跌53點，而全周計則下挫了113點，首季作個總結就錄得2,121點的升幅，相當於11.5%，整體表現其實唔差，只係大家不禁會問年初這個升浪是否已經到了尾聲，因為A股愈跌愈有，歐洲債務問題又似死灰復燃，整體氣氛轉冷，現時大家正觀望今明兩周公布的內地三月份經濟數據，究竟中央會否短期內再出手放水，都成後市去向的關鍵。

衍生工具市場的一班炒友，素來都係只爭朝夕，最緊要順勢而行，睇位定策略，高位做Put，低位開Call，不過咩水平係高位，咩水平係低位，各人睇法唔同，亦係最考功夫。參考市場數據，恒指上周再跌，到20,555點先停一停，部分一直沽落的投資者開始平淡倉，牛證及Call輪好倉錄得5,481萬元資金流入，淡倉就有2,822萬元資金流出，牛熊街貨都顯示較多人願意持牛過夜，恒牛街貨的對沖期指張數達5,083張，明顯多過熊證的期指張數的4,067張，短期睇好的人較多。

炒新地輪膽博膽

新地因兩位主席涉貪被捕的消息令股價上周五大跌，平日股份成交都係得幾百萬股，當日成交激增至1.21億股，相關窩輪成交亦增至4.2億元，是和黃（00013）之後最多成交的個股窩輪，十大跌幅窩輪榜更罕有地全是新地輪的天下，其中跌幅最大的新地瑞信購（17001）收市跌74%，報0.06元，但當日最低曾見0.042元，最高就做0.065元，即日跌幅實際已大大收窄，不少人乘機於低位博一鋪。

中銀香港（02388）去年多賺26%，表現好過預期，部分大行立即出報告撐場，其中摩通就話中銀擁最龐大的分行分布，配合本身強勁資金基礎，再背靠與中行（03988）的關係，睇好前景，提高目標價至25元，睇好其短期走勢的可留意中銀大和購（16911），明年一月二十四日到期，實際槓桿6.7倍，引伸波幅26.8%。