Fundman睇市：瑞聲已有留意價值

上周五，美國公布的密歇根大學三月份消費者信心指數，終值76.2高過市場預期，支持美股做好，標普五百指數第一季累積升12%，創下十四年來最佳季度紀錄。

過去十年，四月份美股往績相當唔錯，紀錄是七升三跌，但近期見唔少分析員對第二季美股頗有保留，擔心汽油價格高企影響消費，業績期完結QE3又未有着落，股市焦點返到經濟數據上，尚幸，聯儲局無將QE3大門關上，美股反覆試高位機會仲係好大。

美銀美林話上星期環球股票基金錄得44億美元淨流出，內地○五年以來首次放棄保八，芬佬對大中華股市熱情大減，中國股票基金錄得1.82億美元淨流出，令年初至今累計淨流入減少至10.55億美元，反而日本股市三月底年結前，獲得2.87億元淨流入。

民企股切忌揸重貨

近期港股受A股弱勢拖累，季結前夕加上地產股「白色恐怖」，上周五，恒指最多跌超過200點，收市前跌幅收窄到53點，全季計數，升11.5%或者2,121點，較最高峰時期升3,326點，掉卻三分一升幅。兩間公司在一日內，把全季累積升幅化為烏有，說的是旭光（00067）及犯官非的新地（00016），前者收市後業績盈利有七成四增長，暴瀉兩成八傳聞同場外衍生工具對賭有關，面對呢類暴動股，往往防不勝防，切忌將所有雞蛋放埋同一個籃子內。

超過500間公司上星期派成績表，中資消費類股份下半年走樣情況嚴重，內地零售市道唔錯，高估值公司標誌着業績容許誤差空間十分有限，看來一次像樣的估值修正會持續。逆境中，頻密的核數師跳船個案，令股市對民企恐懼到草木皆兵的境地。近期有傳聞話幾個揸重二、三線股基金，面臨極大贖回壓力，惡性循環持續的話，短期可能要拉閘清倉。

蘋果公司總裁Tim Cook突然訪華，仲去富士康（02038）巡視生產基地，原來主要應美國公平勞動協會（FLA）報告，希望改善超時工作、加班給付問題，推動規模改革。上星期，先提過蘋果公司同富士康分別位於產業鏈上下游，賺錢能力卻有天壤之別，話口未完，今次減工時變相加薪的額外成本，最後由邊個「啃」，確係唔使問阿貴！尤其華南近期民工荒嚴重，要大量填補不加班所需勞動力，恐怕預期富士康的復甦，有機會被薪酬成本上升抵銷。

另一單關於富士康的新聞，係鴻海斥資8.1億美元，入股日本Sharp近一成股份，成為大股東，分析員估計同蘋果公司準備進軍電視市場有關，交易厲害之處，係蘋果不費一兵一卒，「精人出口」，最後鴻海埋單，坐收漁人之利，唔使管麻煩兼唔賺錢嘅生產供應鏈，又可以間接挑戰對手韓國三星，蘋果假如透過鴻海買面板公司，落實進軍電視市場，或者有份參與iPhone及iPad微型喇叭的瑞聲科技（02018），可能係其中一個得益者，上星期五份成績表麻麻哋，只及預期下限，股價補完裂口後有跌唔落情況，短期不妨留意。