股海實戰：中交建放眼海外市場

眨眼首季完結，美股創自九八年以來最好季度表現，反觀港股同A股就唔爭氣，唔少二、三線股更跌到一仆一碌，尤其係民企股。阿莊冇水晶球，唔知下一隻爆煲嘅民企股係邊隻，總之明知山有虎，無謂偏向虎山行！

上周澳優（01717）、歲寶（00312）、大慶（01007）、寶姿（00589）都先後停牌。呢類股唔係認真多人炒，若然有咩冬瓜豆腐，班基金股東最傷。反觀唔少散戶熱炒嘅旭光（00067），上周五下午三時半過後股價突現大量沽盤，股價由1.9元水平質到最低僅1.3元，收報1.39元，全日跌近28%，真係短炒贏十轉都唔夠輸一鋪清袋！

旭光急挫耐人尋味

睇旭光去年度有錢賺有息派，只係貿易及其他應收帳款同其他經營開支增幅較大，且短債大增，另公司宣布取消收購芒硝礦項目─應林嘅交易。究竟突如其來嘅沽壓係虛驚一場抑或另有原因，即管留意本周發展。

受到長假期氣氛的影響，相信本周的市況以及交投偏靜。本來周初的市況一點也不值得憧憬，惟周日傳來官方公布的內地三月份PMI數字達到53.1，遠優於預期，分分鐘有大戶挾轉淡倉亦唔出奇，惜見同日公布嘅三月份滙豐製造業PMI最終值僅處48.3，與官方的數據相差一大截，難免會惹來官方做手腳粉飾數據的疑雲，致令周初大市的反彈力度亦要打折。

微調策略方向正確

集中講吓穩穩陣陣嘅H股，中交建（01800）派成績表，去年實現收入2,942億元及純利117億元（人民幣．下同），按年增幅分別為7.9%及22.6%，截至去年底止在執行未完成合同金額6,019億元，按年增17.5%。

今年公司目標新簽合同為4,600億元，而銷售收入目標係3,100億元。公司明言，未來會調控發展節奏，適當將發展嘅速度「降一些」 ，使企業發展更加穩健，進一步提高發展嘅質素同效益，長遠會爭取提升海外市場佔收入比重。

對此，阿莊深表認同，畢竟股東睇嘅唔係每年做幾多生意，而係每年賺幾多錢，本土生意若回報過低，不做也罷，保留資源提升內部管理及施工質素，加大力度拓展毛利率較高嘅海外業務仲實際。該股上周五收報7.79元，往績PE 7.9倍，息率2.8厘，估值中規中矩，相信策略上嘅轉變長遠有助提升估值。走勢上，8元關乃長期阻力位，成功突破下一阻力喺8.4元，回吐兩級支持分別喺6.7元及6.4元。

Tip股我至Top

藺俠（3/30）Tip

友邦滙豐購（16725）

最多升21%

Sammi（3/29）Tip

廣豪國際（00844）

最多升9%