樓市出更：東九樓真係識飛

根據地產代理行數據，經過今年首季嘅樓市小陽春後，好多屋苑呎價再升穿舊年年中高位，特別係受起動東九龍同沙中線帶動嘅區域，二手樓升幅最理想，好似九龍灣淘大花園目前呎價，比舊年樓市高位再高7.6%，而紅磡黃埔花園期內呎價亦上升約4.5%。

市區唔少二手樓呎價高過九七年高位，近排劉Sir睇到好多二手屋苑樓價都先後破頂。根據中原城市領先指數嘅大藍籌平均呎價，本港20個大藍籌屋苑中，當中有13個屋苑已經再升穿舊年樓價指數高位，其中因為沙中線等消息而熱爆嘅東九龍地區，二手樓升勢最顯著。

好似九龍灣淘大花園，近排成日話冇盤，原來呎價已經去到近6,300元，比舊年高位再高7.6%，比九七年高位再高出近12%；另外紅磡區嘅黃埔花園，依家呎價亦去到8,456元，比舊年高位再高出4.5%。

麗港城買家90%外區客

香港置業常曉光向來好熟淘大花園二手市，劉Sir同佢傾開，佢話其實300萬鬆啲市區鐵路上車大型屋苑盤，除咗淘大花園，全香港都好難搵到，多咗人入市，買賣盤自然消化得快，樓價上升都好正常；再加埋沙中線同東九龍發展概念，今年特別多人到淘大花園買樓，尤其是外區客都多咗30至40%。

利嘉閣陳維進話，東九藍田麗港城，今年都多咗好多外區客，好似喺三月嘅50多宗買賣成交中，買家佔90%係外區客，相信係睇好東九日後發展，同埋樓價低水，決定跨區入市。

截至剛過去嘅一星期，據代理指數計，20個喺九七年有記錄嘅屋苑中，有成11個平均呎價已升穿當年七月高位，正式返回「家鄉」，其中以北角城市花園升得最勁，比九七年高位再高近30%，而鰂魚涌太古城亦高過九七年24%，反映港島樓價升幅繼續保持強勢。