股海實戰：國美承接區睇位入貨

擾攘多時嘅特首選舉終於塵埃落定，但呢個禮拜係基金季結兼期指結算，指數波動擴大不足為奇。技術上，上周恒指一連跌穿50日及250日線，須於短時間內收復失地，始可扭轉弱勢。

首季美股表現之強勁，令人喜出望外，皆因美國經濟數據持續有改善，儘管距離真正全面復甦尚有一段距離。美國總統大選在今年十一月進行，奧巴馬要爭取連任，相信此前會繼續以「美國經濟復甦圖」來爭取選票，故料次季美股將保持大漲小回局面。而在港股，專門從事出口業務嘅股份，如利豐（00494）和創科（00669），未來一季股價表現可望繼續跑贏大市。

零售百貨股有得諗

商務部帶頭推動嘅消費促進月，會喺四月初開始，故周初不妨留意零售、百貨、電子消費品以及家具等股份，其中國美（00493）將於明日宣布末期業績，市場預計其一一年度純利約24億元人仔。若然末期業績對辦，相信全年派息可增加。以上周五收市價2.05元計，預測市盈率唔夠十二倍，息率2.7厘，估值具承接力。

過去兩年，家電下鄉及以舊換新等措施，已透支部分消費能力，踏入今年，整體經濟增長放緩，四月份又係消費淡季，中央揀正呢個月帶頭促進消費，就係唔想市道太過慘淡，更嚴重係拖垮埋「五一」黃金周消費氣氛。為響應國策，聽講國美擬於本周五起發放總值3,000萬元人仔嘅免費消費券，咁做法公司成本冇咩點大加，卻又能參與全國性嘅淡季促銷活動，應該有着數。

促銷反應如何尚有待觀察，但國策支持令國美股價增添防守性，短期1.8至2元乃主要承接區同支持區，至於業績表現係「驚」定「喜」，呢期股民心血少，唔好咁老定，穩陣起見等業績公布後，股價守住上述承接區才作考慮，初步阻力喺2.3元，支持位1.77元。

Tip股我至Top

Sammi（3/23）Tip太平洋恩利（01174）最多升10%

積奇（3/23）Tip吉利汽車（00175）最多升8%