樓市出更：核心街舖珠寶店霸晒

內地豪客南下本港狂掃奢侈品，而佢哋朝聖熱門地點之一嘅銅鑼灣羅素街，近幾年租戶明顯大執位，全條街已幾近變成國際鐘錶珠寶廊。劉Sir收到一份研究報告，如果用租賃成交金額計算，舊年鐘錶珠寶金行商戶，佔去羅素街舖位商戶比例達71%，比起一○年嘅時候，高出33個百分點；而另一購物區嘅尖沙咀廣東道一段，依家舖位新租戶唔少都係高級鐘錶珠寶店，比例更由一○年嘅11%，躍升至舊年嘅48%。

隨住內地經濟起飛，個人遊旅客來港購物，已由過往一般電器及日常用品，轉為掃高檔貴價嘅鐘錶珠寶商品。據暉煌物業一份報告話，一○年嗰陣，以租賃成交金額計，羅素街鐘錶珠寶金行租戶所佔比例大約只有38%，當時已經算高，但係舊年鐘錶珠寶金行繼續搶租龍頭舖，所佔比例已大幅攀升至71%。

眾所周知，羅素街唔算長，撇開一邊係大型商場外，另一邊嘅商舖廿間唔夠，所以舊年唔少鐘錶珠寶店商戶出高幾倍租金，成功搶佔心頭舖。

羅素街逾九成名店

有代理話，羅素街一個雙號地舖，面積大約400方呎，早前獲國際鐘錶店以每月140萬元預租，比起原租戶付出嘅租金，高出一倍。舊年高消費品嘅鐘錶珠寶與時裝品牌，合共佔羅素街舖位租賃成交量超過90%，佢哋租金出手高，帶動舊年羅素街租金升幅好勁，平均呎租按年升咗有成67%。

廣東道舖漲租3倍

至於近年另一高消費品牌搶租嘅熱點尖沙咀廣東道，舊年鐘錶珠寶金行所佔嘅租賃成交金額比例，更高達48%，比起一○年只係11%，大幅飆升37個百分點。事實上，要租到靚舖，商戶自然要高租金打動業主，據該行資料，廣東道86至98號一個由化妝品租用嘅地舖，租約本來去到明年中先到期，點知早前已經畀一間大型鐘錶店睇中，以每月約630萬元成功預租，新租金升幅高達三倍。