股海實戰：華潤電力部署低吸

好嘅唔靈醜嘅靈！阿莊早前話三月五日驚蟄港股已轉勢，下一節氣可確定方向，咁啱尋日就係春分，恒指見完死亡交叉，再跌穿埋20日線，幾可肯定弱勢已成。若短線恒指進一步失守250日線（20,794點）及50日線（20,671點），唔排除兩萬點關眨眼就到，所以即使唔想做淡友，最多都係企埋一邊唔做嘢，別心急撈貨。

勢估唔到三月份拖低港股嘅唔係歐債或美股，而係祖國魚缸。綜觀A股市場兩大板塊，內房股被上大人廢掉武功，而內銀股排隊等攞錢路人皆知，加埋最近花旗以折讓價悉售浦發銀行A股，以及有十四家地方商業銀行名列中證監在審企業名單中，再融資壓力排山倒海，嚴重打擊內銀股氣氛。

次季A股難寄望

此外，一、二月內地銀行業新增人仔貸款每月平均僅7,000多億元，市場預期三月份會略為反彈，以達至首季2.4萬億元嘅信貸目標，但聽聞截至三月十一日止，四大商行新增人仔貸款不足200億元，差一大截。可見魚缸「缺水」，係A股弱勢底因。若然嚟緊公布嘅經濟數據再次叫人失望，A股好可能成去年十一月翻版，要有心理準備次季要再玩「跳樓機」﹗

內地傳媒報道，國資委擬定出「十二五」期間央企注資規劃，電力等行業嘅相關央企將獲得注資，五大電企或可率先受惠。尋日中資電力股表現強於大市，大唐發電（00991）平收，華能（00902）及華潤電力（00836）分別微升0.8%及0.6%。

潤電去年度賺44.5億元，按年跌9%，略低於市場預期，主要係燃料成本上升所致。展望今年，內地經濟增長放慢，煤價回落有利燃料成本趨降，加上本身嘅煤礦產量亦會增加，整體展望仍屬正面。以現價計算，一二年預測市盈率約12倍，息率2厘，論估值中規中矩，且看行業政策可否帶來催化劑。走勢上，主要阻力仍喺16.2元，料會維持喺13至16元水平上落，考慮到中資股氣氛欠佳，建議候回落至14元樓下再作部署。

Tip股我至Top

藺俠（3/20）Tip

恒指瑞銀熊（60145）

最多升23%

姚午齊（3/16）Tip

瑞聲科技（02018）

最多升6%