樓市出更：代理擴舖愈旺愈要忍

舊年下半年樓市慘歷「冰河時期」，唔少地產代理無奈縮減規模，投身地產界達20年嘅置業18主席張肇栓話，公司喺旺市無過度擴充，亦毋須大幅減分行，現時規模適中，內部磨合開始成熟。但佢強調，就算市況回穩，依家仍然唔係擴充嘅最佳時機，始終租金係直接影響地產代理生存主要因素，目前舖租太貴，要擴充業務，一字記之曰：「等」。

張肇栓同劉Sir講，置業18喺○八年初成立，高峰期有30幾間分行，但舊年下半年市況轉淡，部分貴租分行只好放棄續租，例如約三至四個月前嘅尖沙咀港景峯分行。現時公司分行數目已調整到20幾間，集中喺大角咀奧運站及馬鞍山區，分別有約6間同埋5間分行。

深圳設後勤 慳本五成

另一方面，資源及人手的調配無可避免，佢仲話，一月份裁減咗本港大約30名營業員，中港兩地員工依家加埋有300多人，已比起高峰期超過一千人削減唔少。而為咗減省開支，亦喺深圳自置及租用辦公室，負責電腦數據同會計等工作，營運成本因而大幅縮減一半。

近期樓市升勢強勁，物業買賣急增，但張氏同劉Sir講，要擴充業務需要按部就班，佢話舊年上半年旺市代理爭相開行，「一條街有4、5間代理行」，舖租搶貴晒，營運風險隨之增強，一旦成交配合唔到，就要縮減分行，所以會耐心等租金回落先再部署。

擴充分行首選東九龍

佢仲講到開設分行首要考慮條件係舖租，唔可以「人搶你又搶」，樓市幾旺都要忍，佢相信租金總有回落周期，如果未來要擴充，首選東九龍，因為區內發展潛力優厚。

劉Sir認為，地產代理無疑係「大起大落」嘅行業，不過張氏強調，地產代理亦都係無可取替嘅行業，無論市況順逆都會有成交，而且市況有幾壞，回復都係時間問題，好似九七年金融風暴及○三年沙士，樓市最終都走出谷底，所以未來樓價都好難再大跌。