魚缸Blogger:新奧能源偷步炒業績
尋日先提到,內銀股將會係後市破位關鍵,但資金喺其業績公布前已用沽貨表態,九隻內銀股全線下跌,港股最終以大陰燭收市,如果10日線再失,又差唔多係時候要散水。
港華燃氣(01083)舊年業績好過預期,刺激股價尋日創五十二周新高,但與其高追,倒不如望吓同樣異動嘅新奧能源(02688)。雖然新奧夥拍中石化(00386)收購中國燃氣(00384)台大戲最後唔知唱成點,但近期油價高企,而有力成為其替代能源嘅天然氣,又將會係阿爺重點發展嘅新能源產業,加上新奧下個禮拜二公布業績,現價亦升至近十個月橫行阻力29.7元,不妨喺績前跟進博破位,阻力睇33元。
新奧能源(02688)
阻力位:33.0元
支持位:27.5元