Fundman睇市：中鋁博反彈未係時候

港股昨日大部分時間處於悶局，直到三點後，中移（00941）聯袂內銀股，帶住個市好似倒水一樣，恒指最後跌202點收市，報21,115點，主板成交縮到得557億，乾跌味道極濃。早前，中移管理層在分析員簡報會上，預計一二年固定資本投資1,319億元人民幣，按年升2.6%，係就係高過市場預期，但基於唔少大行預測中移未來兩三年盈利向好，並非由於收入會有三級跳躍進，反而係固定投資及折舊減少所幫助，因此資本開支預期一出，各大行都爭相調低中移業績預估及目標價。

內銀股急跌，講起有點奇怪，賓架老友消息話午後有傳未來兩星期出成績表的建行（00939）及中行（03988），條數可能比大行預期差，筆者認為個市係為插而插搵藉口，因為內銀按季出業績外，二月中blackout前一般都會約見分析員，更新一下第四季營運狀況，加埋頭三季業績早已曝光，按往績，大行預測數字偏離實際3%以內好正常，多過5%算唔合格，話內銀成績表係遭拋售的誘因，說不過去，反而大孖沙怕業績後內銀或向市場伸手，先行避險更可信。

現價買中石化贏面大

春節後，內地通脹開始回落，部分影響民生的價格調整計劃，終於可以出台，發改委年內第二次上調成品油價。唔知係咪春江水暖，中石化（00386）股價昨逆市升0.05元，報9.05元，但居然仍比第一次加價後翌日高位9.54元仲要低，睇番一二年市盈率不到八倍，係筆者睇錯抑或大孖沙唔識貨？總覺得9蚊邊買，畀兩年佢，贏面應該幾大。

霸王（01338）去年勁蝕5.58億元（人民幣．下同），睇番下半年銷售額4.49億元，比上半年4.39億元輕微反彈2.2%，蝕2.63億元，比中期2.94億元減少10.5%，但同市場期望仲係有好大落差。霸王○九年下半年六個月做10.74億元生意，今日得番當時四成二左右，重建品牌，唯一招數係大花銀彈賣廣告，但難以估計仲要捱幾耐，以35億港元市值，至少搵番1至2億元盈利先好諗。

另一隻業績頗令人失望的，是內地氧化鋁生產龍頭中鋁（02600），去年全年賺2.37億元，上半年賺4.12億元，一減之下，下半年見紅蝕約1.74億。業績外，公司同時發盈警，指首季仍在虧損之中。昨日美銀美林報告估首季損失擴大到6.98億元，氧化鋁價因為西部供過於求而偏軟，會繼續困擾中鋁業績。

中鋁盈利波動性十分大，○七年高峰期賺107.5億元，○八年跌到「零頭都無」，得1,949萬元，一○年賺7.78億元，看着這一堆數字，應清楚看到行業周期性相當明顯，這類股份只能在行業接近最衰的時候買入，黃金收成期前賣掉，不是一隻值得長揸的股份。○二及○八年行業低潮，中鋁跌至大約一倍市帳率，今日在0.8倍水平，半杯水故事，可以話股價相當低殘，亦顯示市場認為今次情況比過去兩次更為惡劣，除非有閒錢唔怕長坐兼細細注，否則博反彈似乎未係時候。