股海實戰：中銀香港可以放心捧場

港股尋日三點半前仲企喺21,300點樓上，臨尾市開始「停音樂」，恒指低見21,075點，收報21,115點，跌202點，好在成交唔多，僅559億元。月底係屠牛定熊，呢個禮拜方向會逐漸明確。

尋日大市雖然低收，但跌幅不到1%，多得滙控（00005）撐住半邊天，加埋兩隻油股逆市靠穩，龍頭內房股中國海外（00688）同潤地（01109）亦見反彈。不過，細價股表現就唔多好，上周博士蛙（01698）出事嚇怕股民，加埋半新股業績唔對辦，直接打擊炒賣氣氛。

呢個月底就係基金季結，未知會唔會有粉飾窗櫥效應，或者呢排港股喺21,000點唔上唔落，正已經係發揮緊相關效應都未定，故不宜對此作過分憧憬；反之，若然呢個說法成立，則四月份市況實在令人擔憂，所以阿莊寧可唔做唔錯，唔爭在多等一陣，睇定形勢再作部署。

昆侖能源吼位上車

阿莊三月九日推介嘅昆侖能源（00135）走勢對辦，尋日升抵14元收市，由於短期市況轉弱，照計14元樓下仲有機會上車。此外，發改委宣布今日起上調成品油零售價，尋日提及嘅中石化（00386）股價逆市靠穩，且企穩50日線樓上收市，報9.05元。

中國人保集團及中國人壽集團有人士變動，由於兩集團升為副部級單位，日後其組織及人事權已由保監會轉移至中組部，新安排係保監會副主席楊明生將接替袁力出掌中國人壽，人保集團董事長吳焰則不再兼任總裁，專任董事長。講番國壽集團，袁力自去年五月上任後，集團發展未見大突破，子公司國壽（02628）業績未見起色，股價表現亦遜於同業，且看新人士能否帶來良性嘅轉變。

好耐冇提過嘅中銀香港（02388），尋日股價見異動，成交大增至5.27億元，收市報21.8元，逆市升1.6%。公司將於本月廿九日宣布業績，此前陸續有大行發表報告，其中摩通建議增持，並調高明年預測盈利5%，而高盛則將其評級調高至買入，理由係公司受惠內地相關企業嘅貸款增長，加上其於離岸人民幣貸款市場佔有率達30%，並擁有作為香港唯一一家人民幣清算行嘅優勢。

以中銀現價計，一一年預測市盈率約十二倍，市帳率1.8倍，息率逾5厘。估計月底公布嘅業績唔會同市場預估有太大偏差，不明朗因素主要係今年本地經濟及樓市表現對貸款市場的影響，但即使後市再起波瀾，現價估值應可叫長線捧場客揸得安心。

Tip股我至Top

May（3/16）Tip通達集團（00698）最多升10%

錢進（3/15）Tip新世界百貨（00825）最多升8%