樓市出更:北角電器舖租贏金行

本港唔少以民生為主打嘅二、三線區街舖,電器舖都可以租到龍頭舖。劉Sir收到風,有間外區連鎖電器行啱啱用咗近二十萬預租一個喺北角港鐵站隔籬、正正喺英皇道同書局街交界嘅單邊地舖,呎租約195元,創附近街舖呎租新高之外,比鄰近一間金行現租用嘅單邊地舖呎租高逾三成。

北角新光戲院成功續租,唔少戲迷都話以後睇戲唔使周圍搵,吃喝玩樂留番喺北角就搞掂晒,所以好多商戶睇好嗰區消費後市,積極搶舖。利嘉閣劉偉成同劉Sir講,上述英皇道442至456號地下單邊舖,面積大約1,000方呎,門面闊60呎,原先租畀一間連鎖健身中心,月租大約16萬元。

由於個舖係罕有大單邊,加上對住港鐵站,所以租約到期無耐,已經有幾個商戶洽租,業主開價每月約22萬元,較前租多約近38%,喺嗰區嚟講,加幅算係好合理。

聽講早前有間食肆對上址都好有興趣,不過業主考慮到衞生等問題,最後決定租畀一間上市集團附屬電器行,月租約19.5萬元,較之前高約22%,而由於個舖罕有,呎租約195元,創嗰條街附近嘅新高之外,相比附近英皇道402至404號一個現由上市公司金行租緊嘅地舖,月租約27.5萬元,呎租僅148元,可見電器行喺民生區最有「牙力」。

上水工貿樓155萬摸出

劉偉成仲話,上址業主早喺七十年代以約35萬元買入,一向都長揸唔放。另外,由於新租客下個月才收舖,業主物盡其用,依家暫時短租畀影音光碟店,不過,月租幾多就無人查到。

另外啱啱收到風,一個上水貿易廣場單號工貿單位,上月底投資者先至以約138萬元購入,近日以約155萬元摸出,二十日執17萬元,都幾和味。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

劉Sir

剛獲電器行預租的英皇道單邊地舖,原先的租客為健身中心。(資料圖片)