股海實戰：中石化上升動力增強

眼見上周美股勢如破竹，偏偏港股就不為所動，阿莊感慨良多，事緣想起十多年前港股極受日股同美股表現影響，到咗今時今日，日股喺區內影響力大減，港股就連美股都唔跟，只係緊跟A股表現。

回說市況，指數窄幅波動，除咗幾隻重磅藍籌輪流發力撐住大市之外，異動板塊亦唔多，炒家身處呢類市況係最難受，皆因指數冇波幅，股份冇焦點，咁仲有咩好炒？

上周傳來博士蛙（01698）被「熱水殺蛙」，唔少炒家上周四上午不知就裏衝入去諗住「執平貨」，點知中伏一鑊熟！阿莊就識得一位幸運高人，佢喺上周三買入博士蛙，但見隻股由即市高2.77元掟番落低位2.57元，唔多對路便忍痛沽貨，翌日方知自己時運高，輸少當贏！

炒民企保本最緊要

經歷一次又一次民企爆煲事件，阿莊嘅結論係，散戶必須要緊記，炒賣民企股風險遠較其他中資股（紅籌國企）為高，一有咩風吹草動，保本係第一，賺唔賺錢係其次，想空手入白刃執平貨，就要先問自己輸唔輸得起！

國際油價持續上升，足以威脅歐、美經濟復甦進度。美國正值總統大選年，近期公布嘅經濟數據向好，帶動美股破位而上，上周市場傳出，奧巴馬政府為免油價上升影響選舉大局，正與英國商討聯手動用戰略石油儲備嘅可能性，據講最快會喺年中前達成共識。

若然呢個消息屬實，對全球股市應該係好事，對石油股亦不一定係壞事，事關若然讓油價繼續飆升，打擊全球經濟，最終只會拖低石油需求。反而，油價穩定，經濟持續復甦帶動石油需求增長，先可以締造雙贏。

提到油股，兼營石油石化業務嘅中石化（00386），上周五股價逆市做好，皆因市場憧憬短期內地將會上調成品油價格，並同時會就成品油調價機制推出新措施。筆者執筆時尚未聽聞消息落實，但相信呢個係遲早問題，皆因自上次（二月七日）上調成品油價格之後，無論係時間同漲幅，都已具備再次提價嘅條件。

今年一月上旬，阿莊亦曾提出可以候低收集中石化，當時建議落番8.5至8.6元再睇位，上周收集機會果然出現，眨眼上周五股價又已重上9元，短線繼續守穩上升通道支持8.8至9元，再試上月高位9.67元嘅動力會逐步增強，向下8.5元已成重要防守線，不宜有失。

Tip股我至Top

暴炒男（3/12）Tip

合生元（01112）

最多升11%

Sammi（3/15）Tip

利豐（00494）

最多升10%