樓市出更：家長客屯門樓拔尖

近期唔少業主見樓市旺，將放盤吊高嚟賣，令到二手交投好似有回落迹象，但個別地區由於有其獨特嘅利好因素，所以交投仍然保持穩定。好似屯門小欖一帶樓市，喺國際學校將會進駐之下，未來學校嘅家長及教員已經率先起動，令區內租務同買賣市場客源增加，有國際學校嘅家長更加豪掟11萬元，月租屯門黃金海岸巨宅複式戶。

做開屯門區一帶嘅地產代理老友同劉Sir傾開，佢話近排區內小欖貴價樓租務同買賣市場，都有轉旺迹象，收到查詢比之前多咗，主要係區內好快會多一間富豪國際學校，呢班家長為咗啲寶貝仔女，已經開始搵定租或買賣盤，等班仔女以後返學唔使舟車勞頓。

有代理就同劉Sir爆料，其中有個家長客，睇中屯門小欖黃金海岸位置唔錯，於是用咗大約11萬元月租，租住屋苑近海平房低層連花園嘅複式單位，個單位面積估計約3,000幾至約4,000方呎，呎租成30多元，絕對係屯門區罕有嘅大租成交。老友話，其實呢類複式單位，早前月租約莫8萬至9萬元，今次由於連埋全新廚房同浴室裝修，所以月租比之前高少少。

教員750萬買帝濤灣

除咗家長率先起動之外，原來學校教職員，更已經入定市，為新學期做好準備。晉誠地產周樂都話，隨着屯門小欖大型國際學校進駐，近期區內多咗一批外籍客源，當中多數係國際學校嘅家長同教職員，令區內二手市場轉趨熱鬧。

佢話，最近有個附近學校教職員，用750萬元買入帝濤灣6座中層連車位單位，個單位面積約1,510方呎，呎價4,967元，屬於市價成交，估計新買家買入上址，大多數會作自住，方便日後返工放工。

二月份區內就賣咗一幅掃管笏住宅地，成交價逾27億元，之前入標財團有7間咁多，聽講發展商睇好區內間國際學校會帶動未來區內樓市先至入標。