魚缸Blogger：達芙妮強勢未見頂
隔晚美股兩大指數破頂，港股尋日朝自然有運行，不過溫總一句樓價遠未到合理價，就好似一盆冷水照頭淋，最終收市出現烏雲蓋頂嘅不利訊號，股友們呢兩日緊記要扣好安全帶！
尋日晏晝返嚟，唔少股仔已經開始走樣，但啱啱破位嘅達芙妮（00210）仲可以保持強勢，逆市升近5%。達芙妮將會喺下周一公布舊年業績，睇番集團舊年連續三季嘅同店銷售增長企穩兩成樓上，而中報嘅純利（唔計認股權證嘅公平值虧損）增長及毛利率亦分別達35%同61.2%，加上阿爺力谷內需，全年嘅表現應該唔會太差，且股份尋日抽穿近兩個月嘅密集區阻力10元，向上暫時進入無阻力區，首站先睇11元。
達芙妮（00210）
阻力位：11.0元
支持位：9.8元