Fundman睇市：聯想升勢有餘未盡

聯儲局主席伯南克前晚的議息聲明，對美國經濟前景展望更趨樂觀，雖然無再暗示推出QE3，但近期經濟數據咁好，睇怕都會留番子彈，等年底美國總統大選前至用。摩根大通宣布調升派息，潛台詞係次按風暴的影響逐漸遠離，資產負債表最壞時刻過去，北美銀行唔需要為《巴塞爾協定III》的資本充足比率擔心，消息刺激道指升1.7%。

昨日溫爺爺在記者會指出內地民眾（未置業的一群）對樓市調控力度不足而抱怨，又話現時內地樓價仲係遠高於合理水平，此話一出，近期認定了內地打擊炒樓措施即使唔鬆亦唔會收緊的樂觀派，忽然如夢初醒，湧向逃生門，A股中一眾內房及建材股如山泥傾瀉一樣，連累到一度升約300點的港股，最後要倒跌31點，收市報21,307點。睇番唔單止港匯偏軟，連人仔尋日亦一度跌到去6.3461，見今年新低。

高息債市人氣旺盛

史提芬多次提過，近兩星期港股反彈顯得陰陽怪氣，跌市成交大，升市成交卻縮，資金輪流掃高重磅指數股托住個市。基金朋友直認近期惡玩，可以賭大錢的內房、內銀及內險股政策未配合，逼芬佬加入即日鮮遊戲，中移（00941）、和黃（00013）、核電設備同內需股，梅花間竹掃高，可惜升勢極其短癮，簡單啲講係得個做字。不過，基金現金多的確係事實，近期中資股的高息公司債市場相當熱鬧，雅居樂（03383）早前發10厘年息CB，錄得超過八倍認購，而佢隻一七年債券，由年初14厘碌到落尋日9.7厘，返到去年八月歐豬危機前水平，依然捧場客不絕，總結個市短期有必要回吐，但又唔似要跌太多。

買唔到iPad，諗住趁高興買番多少蘋果公司股票，眼見年初股價仲係420美元左右，輾轉前晚已經去到575美元，逼近600蚊關口，目前市值5,300億美元，或者4.13萬億港元，足足等於兩間滙控加埋中移咁大，誇張到極。

科網熱結束十二年後，蘋果公司、Google及即將上市的facebook相繼跑出，證明資訊科技唔係泡沫，淘汰賽完結後，強者正陸續冒起。中國的聯想（00992），自收購美國IBM個人電腦部門之後，在全球硬件市場發展，有三級跳的趨勢，早前第三季度業績，賺1.53億美元創新高，在全球PC市場份額，也進一步逼近一哥惠普（HP），差距由去年的9%收窄到2.2%，看來坐上龍頭寶座只係遲早問題。

從IBM取經，聯想似乎發展路線有所調整，了解到不能單靠提供平價電腦、鍵盤或者周邊硬件制勝，一如蘋果公司、惠普等巨頭，近日正開發個人雲端技術，準備同本身智能產品，例如手機、平板電腦及智能電視融合。研究報告顯示，分析員對新發展極為受落，以聯想一三年估值14.8倍，唔算十分平，不過近幾個月電腦及資訊科技股平均估值有水漲船高之勢，聯想較行業平均16.8倍開始有折讓，股價強勢估計仍會持續一段時間。