股海實戰：德昌候調整吸納

美國聯儲局一如預期未有提及QE3，但就對美國經濟抱樂觀看法，語調正面，足以提振股場人心。前晚美股急升，帶動港股尋日高開224點，恒指全日高位見21,638點。誰知溫總講話震散A股，拖累港股亦急速回落，恒指轉升為跌，收市報21,307點，跌31點，成交增至807億元。

究竟近日大量流入中移（00941）嘅資金，意圖是否純粹挾淡倉，仍然係阿莊心裏一個謎！今日中移宣布業績，預計會係平平無奇，本來就不應作過分憧憬或炒作，而以之作為沽售藉口，亦同樣顯得有點牽強。咁究竟除咗業績之外，管理層會唔會提及其他新嘅業務發展，正係焦點所在。

資金南下維穩港股

近期股市表現陰陽怪氣，令人忐忑不安，阿莊忍唔住向表叔請教，佢話要留意本月下旬前，可能陸續有內地資金流入香港，部署「維穩」金融市場嘅工作，係真唔係，不妨等着瞧！

中資股唔上唔落，將視線轉移其他股份。美國上月零售銷售按月增1.1%，勝市場預期，估計大選前經濟數據會繼續見到改善，呢段時間係炒出口股嘅安全期。尋日利豐（00494）逆市升3.9%，創科（00669）則無升跌。同樣主營出口業務嘅德昌（00179），股價升2.7%，收報4.81元。

上月德昌披露截至去年底止首三季度銷售額達到16.12億美元，撇除減持業務嘅影響，首三季度銷售額同比上升8%，單計第三季度則錄得2%增幅，主要係北美及內地等新興市場需求帶動，預計全年度盈利約1.75至1.85億美元。現價一○年度市盈率十二倍，假設截至本月底止年度業績按年大致持平，現價估值中規中矩，料股價維持在4.4至5元上落，現水平暫且忍手，待回落至4.5至4.6元水平可作考慮。

Tip股我至Top

暴炒男（3/13）Tip中廣核（01164）最多升13%

錢進（3/12）Tip中石化冠德（00934）最多升9%