旺角舖加租3倍恭候名店

近年跨國大品牌開始搶租旺角龍頭地舖，唔少業主都唔執輸，把握機會加租，加幅更加以倍數計；投資者黎永滔同劉Sir講，佢旗下依家由連鎖服裝店租緊嘅旺角文華1期地下部分及1樓部分，租約會喺今年年中到期，新月租相信要250萬元，比起依家多出超過3.1倍，呢個租金加幅可以同港島銅鑼灣嘅舖位睇齊。

黎永滔話歐洲唔少大品牌睇好亞洲消費市場，部分都爭住在港開設分店，個別可以畀高成倍租金，為商舖物業打下加租嘅強心針。

文華萬呎舖叫租250萬

佢話上述旺角文華1期地下部分及1樓部分，面積大約1.2萬方呎，租咗大約三年，近排已經有唔少國際服裝店及潮流產品商洽租，意向新月租要約250萬元，比舊租高出超過三倍。

至於同區嘅旺角亞皆老街67至71號一項商用物業，現由服裝店租緊嘅1樓全層，以及依家由網吧租用嘅5樓全層，租期最快都係今年到期，兩物業意向新月租各約38萬元及10萬元，亦較現租金分別升近1.6倍及1倍。

觀塘工廈活化嗌3億

近年香港磚頭升值，加上租金跑贏大市，佢旗下喺本港及英國嘅一籃子物業，目前市值約達70億元，比起舊年同期升咗大約四成。

事實上，近排工商舖小陽春愈燒愈旺，唔少資深投資者都趁機出貨。「舖王」鄧成波啱啱獲批改裝活化做酒店嘅觀塘凱康大廈，依家搵咗中原工商舖放售，意向價大約3億元左右，上址樓高21層，舊年已獲批建110個酒店房間，咁計起來，每間房大約叫價270萬元。

紀惠灣仔一籃子3.8億放

同一時間，紀惠集團或有關公司嘅灣仔莊士企業大廈地下、1樓、2樓及3樓，連同廣告位A、B、C、D一籃子物業，近排就委託咗第一太平戴維斯放盤。

上述項目總樓面大約1.7萬多方呎，現時租客包括便利店及餐廳等，業主意向價大約3.88億元。