股海實戰：金鷹20元邊唔怕買

市場觀望美國議息結果，但此前部分炒家已按捺不住，率先入市。恒指尋日最高見過21,427點，收報21,339點，升205點，成交回升至602億元。中移（00941）及和黃（00013）雖有回吐，但沽壓不太大，加上長實（00001）、太古A（00019）等接力，內房及內銀氣氛亦有改善。

尋日內地傳來七部委指，會致力保持首套房貸政策穩定，督促銀行業金融機構支持居民家庭購買首套普通自住房。聽講其實呢個報告喺二月經已做好，但依家才被官媒報道，相信係要申明調控政策旨在控制樓價不要過分上漲，但同時會確保滿足到居民基本住屋需要。

內房股短炒無妨

換言之，只要房企踏實推盤，銷售情況未必如想像中咁悲觀。再講，早前盛傳呢兩個禮拜內地可能再提物業稅問題，但至今未見影蹤，政策不明朗因素消除，配合二月份內房銷售數字略優於預期，冇壞消息就當成好消息炒。雖然阿莊對內房仍有戒心，但亦唔想阻人發達，睇實交投短線跟炒無妨，大前提係要SET定止蝕位，且緊記目前未到瞓身撈底內房股嘅時候。

另一方面，醞釀多時嘅促進消費措施終於有眉目。據聞商務部正部署今年首個消費促進月，自下月二日至五月四日止，內需股有入手價值。金鷹商貿（03308）近日宣布去年度業績，全年純利12.12億元人民幣，同比增長26.4%，表現符合市場預期。雖然年內銷售額略低於預期，但透過妥善控制員工成本及推廣開支，有助抵銷相關影響。難怪尋日股價應聲上揚，高位做20.5元，收報20.15元，升5.39%。

截至去年底止，公司手持現金及類現金達37.9億元人民幣，足以應付業務發展。管理層預期，今年同店銷售增長目標為15%或以上，銷售總額目標增長25%。雖然受到季節性因素影響，今年一、二月銷售表現可能較遜色，但相信隨着近次降準效應逐漸浮現，加上多部委聯手催谷消費，相信首季末以至次季表現有改善空間。

以現價計，金鷹一二年度預測市盈率約二十一倍，可喺19至20元水平收集，以一二年預測市盈率二十五倍計，中線目標可定喺23.75元，重要支持喺250日線18.5元。

Tip股我至Top

志強（3/6）Tip茂業國際（00848）最多升15%

積奇（3/12）Tip紛美包裝（00468）最多升12%