樓市出更：落後舖搶到巔價仲係筍

消費核心區靚舖租金升勢凌厲，龍頭舖都差不多被搶購一空，有投資者遂轉而追擊同區落後盤。劉Sir啱啱收到風，資深舖位投資者李耀華增持尖沙咀栢麗購物大道一個地下相連孖舖及一個樓上舖，作價共近4.4億元，有代理話呢次單一買賣成交價，係栢麗大道從來未做過，而相連孖舖二手成交亦係歷來首宗，是次成交呎價約12.7萬多元，呎價落後同區，相信具升幅潛力。

近年尖沙咀高檔消費集中喺廣東道，呎價一般講緊要20多萬元，甚至近70萬元，而早前廣東道有個1樓全層，呎價都要12萬多元，因此唔少人都認為，未來幾年，區內老牌購物街之一嘅栢麗購物大道，將會接棒成為區內舖價上升熱點。

金馬倫道舖 呎價17萬

第一太平戴維斯副董事總經理袁志光話，上述相連孖舖係栢麗購物大道地下29及30號與1樓15號舖，面積大約3,470方呎，李耀華早前斥約4.4億元買入。有代理計吓數，呢間舖呎價差唔多12.7萬元，相對早前金馬倫道有個地舖呎價都要17萬多元，是次舖位更開揚，加上位於傳統旺區，所以呎價算係好筍。

聽講個舖新租客每月租金近140萬元，即收租回報大約3.8厘，相比起一線街舖個別收租回報只約1厘，是次算是好理想。至於上址原業主早喺八六年以1,600萬元一手購入。

環球呎租75元算理想

事實上，李耀華向來都鍾情投資栢麗購物大道商舖，佢早在○九年已經買咗嗰條街嘅18號地舖，當時作價大約近1.4億元，呎價都係約12萬元。

另一方面，港島商廈市場亦出現小陽春，據講金鐘美國銀行中心有個低層戶，剛以呎價約2.3萬元賣咗，算係近一年理想價，而成交價大約7,280萬元。

此外，中環環球大廈一個高層戶以每方呎約75元租出，係近年理想呎租，月租大約8萬元。