市場徐想：央行開倉借咗先講
上周最重要嘅消息，當然係落實咗嘅第二輪長期再融資操作（LTRO）！歐洲央行不斷借錢出街，扶持各大僵屍政權。借錢容易，希臘係無計可施之下，必定先拎錢為敬！但係當要緊縮財政，慢慢還錢時，希臘政府有極大機會選擇違約。所以，今時今日唔違約，唔代表日後安全！
歐洲央行公布第二輪LTRO貸款結果，連同去年十二月首輪貸款，合共向銀行體系注資超過10萬億港元。依家印銀紙拆借嘅數目，已經係天文數字！
第二輪LTRO借出約5,300億歐元，比首輪多410億歐元，參與嘅銀行有約800間，比首輪增加50%，當中好多都係中小銀行，大部分來自德國。
歐央行呢種融資安排，主要想解決銀行體系嘅流通性危機，至少令佢哋可以喺市場借錢周轉。不過，冇乜問題嘅德國銀行點解都會走嚟借？原因好簡單！依家唔理三七二十一，借到錢就係神仙，一於大家一齊借，有個錢擺係褲袋都係好事！