Fundman睇市：百盛估值偏低博得過

前晚，美國二月份ADP私人企業職位數據比預期好，華爾街對官方今晚公布的二月份就業數據，期望更大，暫時預測非農業職位增加21萬份，如果達標，應有足夠說服力，證明美國踏入一二年經濟復甦動力未有放慢。

三日跌掉934點後，港股低位終於見反彈，恒指升272點，報20,900點，250日線失而復得，市後解畫認為港股憧憬希臘債務重組，在今日凌晨死線之前可獲得九成以上的足夠參與率，大市升跌股份比例創一個月新高，是一面倒的83比17，可是主板成交額得644億，少近兩成，似乎芬佬在希臘換債明朗化前，只係抱住怕輸又要賭的短線投機心態，升市全因連跌三日後沽壓收斂。此外，沽空佔主板成交比例6.7%，創今年第二低紀錄，但睇番星期二沽空比例創5.65%今年最低，係因為友邦（01299）巨型批股，有468億元股份上板所致，實質當日沽空比例應為8.9%，故尋日先至係本年最低，可見就連空軍都睇唔通後市！

不過近日投行吹風，有幾隻主要內房股準備成績表一曝光，就會發CB或者透過批股吸水，加埋高盛再沽工行（01398）只係遲早問題，大市要再發光發熱，短期有舉步為艱之感。

減奢侈品稅影響大

近期熱們話題離不開八年來，中央首次放棄保八重任，全年預期經濟增長率僅7.5%。儘管在通脹及樓價未肯合理化的限制底下，透過減息刺激經濟空間有限，但有內地媒體表示，今年中央會減低消費品及奢侈品稅，實行進一步提振內需，以刺激經濟，可見中央彈藥充裕，新班子即使要保八，難度相信亦不會太大。

同胞喜歡來港購物，內地徵收奢侈品進口稅是主因，因同樣貨品在港購買價格較內地平一截，可見奢侈品進口稅，是一眾既得利益者，包括本地零售業及商舖業主的一塊大芝士，一旦有改動，對於投資主打遊客消費的零售股，好似周大福（01929）、六福（00590）及莎莎（00178）等，或旺區大地主如希慎（00014）及九倉（00004）等勢必有影響，故要打醒十二分精神（目及）實消息發展。

至於政策改動的受惠者，最大機會跑出的，是幾隻主攻內地零售之品牌，普拉達（01913）、歐舒丹（00973）等近期股價強勢，相信並非無的放矢。再找落後股，史提芬認為走高檔百貨路線的百盛（03368），或者都有火燒冷灶的機會。

去年百盛賺11.23億元（人民幣．下同），升13%。作為高檔百貨龍頭，一成多的增長，或者同股民高標準的預期有落差，但事實上，去年第三、四季內地消費環境轉壞，百貨業競爭激烈，唔少內地零售股早已被調低同店銷售及業績增長預測，惟百盛業績後未有太大沽壓，在9港元左右找到支持。

過去的四個星期，大行平均把百盛今年業績預測調低4.9%，但大部分投行賓架對百盛「口淡淡」，反而可能是一次機會。按預測賺12.78億元計，市盈率16.6倍，十分接近上市以來介乎15.3至70倍的下限，博內地稅制改革，會係低風險的一個選擇。