股海實戰：昆侖能源可逢低收集

港股三個交易日唔見900幾點，吊頸都要抖抖氣，尋日乘外圍市況回穩而作出反彈，恒指重上250日線收市。牛熊分界線係預測後市方向嘅重要指標，短線喺該水平有爭持實屬正常，若然最終未能企穩其上，則不妨耐心一點，等回試50日線20,256點支持再作部署。

港鐵（00066）派成績表，年度純利147億元，增長22%，表現優於市場預期，現價計市盈率10.7倍，相信呢份業績可引發市場重估。以市盈率十二倍計，合理值30元。由於本港鐵路覆蓋日益完善，未來又有新線路落成（如沙中線），鐵路運輸業務可保持穩定增長，只係地產相關業務收益較為波動，但目前嘅估值，某程度已反映呢方面嘅風險。

京能博見2元關

股市處調整期，但仍有股份股價創出新高，其中一隻係旺旺（00151），自公布業績後股價持續做好，尋日高見8.8元，收報8.76元，升4.6%。另一隻股價創新高嘅股份係京能清潔能源（00579），高位見1.83元。此股自去年十二月掛牌以來，股價一直在1.6至1.7元水平徘徊，昨日成交配合大增，相信升浪冇咁快玩完，可以小注跟炒，博快見2元關，穿招股價1.67元止蝕。

此外，尋日見到冷門H股南京熊貓（00553）一度高見2元，收報1.95元，升幅16%，成交840萬元，據聞係同母公司業務重組有關。呢隻股自今年一月初以來開始有異動，尋日一棍抽穿250日線，話唔定月底公布業績會有利好消息，可以視為冷敲之選。

尋日市場流傳，內地將會透過減稅來刺激消費，故見百貨、體育用品、家電、零售等股份低位有資金抄底。但阿莊依然相信，體育用品股的調整未完，追入時別忽略行業正處調整期嘅風險。

中石油（00857）旗下嘅昆能（00135），去年底已完成收購中石油北京天然氣管道60%權益，隨着收購效益展現，未來業績值得睇好。

昆能將於本月底宣布年度業績，市場預計純利約52億元，現價預測市盈率約十八倍，一二年預測市盈率更低，較值較同類股吸引，可逢低收集作中長線持有。

Tip股我至Top

積奇（3/6）Tip茂業（00848）最多升12%

史提芬（3/7）Tip旺旺（00151）最多升12%