股海實戰：味千難脫上落格局

全球焦點盡在希臘嘅命運，此前投資者入市撈底態度審慎。港股尋日隨外圍走低，恒指低開284點後，反覆偏軟，全日高低波幅210點，收報20,627點，跌178點，成交791億元。呢鋪希臘過到關嘅話，大家都可以鬆口氣；但若然班私人債主唔肯收貨而要攬炒，觸發信用違約，咁就真係又有排震，歐債危機將再次升級。

港交所（00388）收到兩家H股作出供股申請，一般估計不離內銀內險股，若然真係有內險股份，唔少經紀都估可能係中國人壽（02628），係真唔係，業績後自有分曉。

市場水緊A股不振

事實上，中資金融及房地產股水緊唔係新聞，呢個星期五招行（03968）便會發行總額不超過200億人仔嘅金融債券，班內房老闆亦喺度動腦筋透過各種方式集資，仲尚未計外資股東擬沽中資股套現，如高盛便擬再進一步減持工行（01398）股份。總之，四方八面都喺度撲水，A股後勁不繼，實有其原因。前日沽出嘅中信証券（06030），尋日股價插穿16元關，低見15.68元，好在下定決心沽貨，走得快好世界。

短期指數波動可能持續擴大，傳統板塊博唔過，睇其他股類，舊年備受「豬骨湯」事件困擾嘅味千中國（00538），上月經已就去年度業績發出盈警，預計少賺兩至三成，惟見股價未有跌穿年初低位8.25元，反而展開一輪反彈行情，尋日味千股價逆市走高，高位見11.38元，乃自去年十月底以來高位，收報11.26元，升3.88%，成交8,754萬元。

走勢上，目前其250日線正處於12元關，此位亦係自去年第三季股價急挫以來嘅主要阻力位。以現價計算，一○年度市盈率為26.9倍，一一年度預測市盈率為38倍，講真估值唔算係便宜，即使今年業務逐步重拾正軌，除非有購併活動，否則預期整體發展係求穩定而非求突破，股價暫難擺脫喺8至12元嘅上落局面，呢啲位先上車未必划算。

Tip股我至Top

藺俠（3/6）Tip中壽高盛沽（16769）最多升57%

甘俊（3/6）Tip正通汽車（01728）最多升9%