樓市出更：高價搶盤 居屋一樣咁激

樓市回春，積累嘅購買力唔單止湧入私樓市場，同時亦向二手居屋市場進發。好多代理朋友話，唔少居屋最近都出現搶貨、甚至高價成交，好似牛池灣嘉峰臺有個高層戶，近日以435萬元自由市場價賣出，呎價高達6,268元，無論呎價同做價都係屋苑歷來新高。

富誠地產林栢榮同劉Sir傾開，話市場氣氛回暖，亦都推動二手居屋市況向好。啱啱以呎價6,268元創屋苑歷史新高價成交嘅嘉峰臺，係一個3座高層H室三房戶，面積694方呎，由於屬高層，加上望東南公園景，屬屋苑嘅優質單位，所以一名同區換樓客亦不惜以435萬元成功搶盤。

龍門居呎售3861新高

除咗九龍區外，新界二手居屋做價升勢都銳不可當。好似屯門龍門居繼前排出現綠表呎價新高後，啱啱亦錄到自由市場呎價歷史新高。祥益黃慶德話，屋苑13座低層兩房戶，望海景兼河景，加上有企理裝修，所以近日獲買家以195萬元自由市場價買入，呎價高達3,861元，創屋苑呎價歷史新高。世紀21奇豐黎健峰亦話，馬鞍山錦豐苑E座中層一房戶，以168萬元綠表價成交，呎價2,795元，比市場一般同類型單位做價高約5%。

瓊山苑257萬閃電售

市場亦連錄多宗即睇即買個案。好似鑽石山龍蟠苑C座中層一個兩房單位，以自由市場價245萬元放盤，有上車客一睇樓即扑錘買入，呎價約5,104元；牛池灣瓊山苑A座一個低層三房戶，亦獲用家以自由市場價257萬元即睇即買，呎價約3,918元。

藍田康華苑有個中層戶啱啱放賣，即被心儀用家搶盤。世紀21聯誠謝寶昭話，屋苑C座中層一房戶，放盤只係兩個鐘，就由上車客以自由市場價202萬元買入，呎價約4,307元，屬市價。二手居屋受追捧，連帶租金都被推高，鄰近嘅康柏苑，有一個E座高層兩房戶以每月9,000元租出，呎租約17.5元，係該屋苑今年呎租新高。