市場徐想：先施錶行大有睇頭

講咗咁耐，第二階段延長交易時段已經喺昨日正式開始。午飯時間由原來個半鐘縮短至一個鐘，令到Prof. J嘅生活作息都要跟住變。出街同客午飯幾乎已經冇可能，只有自嘆辛苦命，真陰功。經紀業界班老友記實唔合皮時間上長咗，成本又幾何形式增加。

時代巨輪不斷進步，電子金融亦慢慢形成一股力量，證券行業由開始走上電子路，都由港交所（00388）拖住你隻手來行，你無得唔行。小型證券行嘅資訊科技能力遠遠低於華資大行同投行，似乎證券行老友記都要好好為自己搵出路方為上策。

講開搵出路，Prof. J幾時都欣賞朱太，見親佢都珠光寶氣，華麗登場，雍容華貴就梗係唔使講，呢期開始向高檔次手錶業務出發，講嘅係佢以私人名義買起先施錶行（00444）75%控股權，佢話貪公司持有嘅品牌Franck Muller。雖然9.63倍PE唔算好平，但今時今日以朱太嘅卡士同喺金融界嘅影響力，以個人名義入股必有睇頭。