Fundman睇市：高鑫高昂估值受考驗

上星期，聯儲局主席伯南克出席國會會議，美國新一輪量化寬鬆QE3遙遙無期，歐洲二輪長期再融資操作（LTRO）又炒完，借咗平錢的800間歐洲銀行，一如買保險一樣，情願蝕息泊入中央銀行都唔肯將錢借出街，全球最大兩條水喉暫時無動靜，股市焦點好自然返去實體經濟身上。

歐盟領袖要成員國大刀闊斧削減開支，降低財政赤字，本來經濟唔好，最需要政府使錢大興土木創造就業，但掉轉頭此時此刻要節衣縮食，不良效果是顯而易見。尋日歐元區國家公布二月份採購經理指數（PMI），唔好，本是意料中事，只係估唔到差成咁，歐元區整體上月PMI終值，從一月的50.4跌到49.3，回到50擴張收縮線樓下，經濟活動死貓彈之後，又有再回落迹象，當中只有老大哥德國仲撐得住，有52.8（一月為53.7）；意大利44.1，去到兩年半低位。

中國放棄保八，今年經濟增長估計只有7.5%，港股借勢調整，跌296點，報21,265點，乃今年第一次低於20日線（昨21,268點）收市，假如短期未能收復失地，超買的港股短期進一步調整的機會將會增加。港匯近期有轉弱迹象，昨日再跌0.0041，去到7.7629的五個星期低位，資金似乎有流出趨勢，睇走勢恒指有機會回試250日線（20,896點）支持。

一、二月港股牛氣沖天，市場對壞消息有強勁抵抗力，股市由低位回升三成幾。踏入三月業績期，市場對上市公司失望的業績，仲可唔可以視若無睹，確實是對股市大好友一次嚴峻的考驗。

水泥股好景不復再

去年上半年，基建需求帶動加上政府勒令中小型效益差水泥廠關門大吉，造就水泥價格急升，水泥行業出現一陣罕有而短暫的高毛利率黃金時代。但去到下半年，強如龍頭水泥股安徽海螺（00914），股價雖由17.9元低位升返到25.15元，但同去年上半年高位41元比較，仲低近三成九，可見水泥股高增長、高估值時光，一去不返。

潤泥（01313）去年賺41.8億元，大增逾一倍，惟仍低過市場估計的44.85億元，昨高開低收，報6.25元，跌0.32元。業績後，分析員修訂今年預測，介乎35.6億至52.5億元，以中位44億元計，市盈率9.3倍，比海螺高兩成四，短期值博率一般。

另一隻掛牌後估值一直貴得驚人的高鑫零售（06808），一一年業績唔錯，多賺55.2%至16億元人民幣，但業績曝光後，立見反高潮，股價急跌0.71元，收報9.93元，跌幅6.6%。

高鑫歷史市盈率36.6倍，加上新股造成的攤薄今年才完全反映，即使今年賺24.45億元人民幣，市盈率都高達三十一倍，比其他內需股平均的十二至十六倍高一大截。據分析員會議上資料，首季同店銷售因春節影響，只有單位數升幅，次季雖回升，但亦只是建基於去年次季基數較低，加上新店的初期開支較高及薪金壓力上升，都對高鑫構成壓力。種種迹象顯示，短期業績被重估風險頗大，而市場對高PE股業績失誤的寬容度向來較低，想趁機撈底的，毋須急於一時。