股海實戰：中海石化可分注收集

今年內地經濟增長將會放慢，追求重質不重量，本來呢件係好事，畢竟呢輛高增長列車經已衝咗咁多年，係時候停一停，理順內部關係，化解矛盾，打穩基礎再起步。但對股市投資者嚟講，這可能意味一段時間內股市缺乏上升理據，只有繼續靠炒波幅過日子。

中午休市時間又再縮短，尋日聽班經紀怨聲載道，事關工時不斷加，但生意冇多到。當局堅持執行延長交易時間，理由係增強喺區內嘅競爭力，呢啲口號好難量化，尤其係喺目前經濟不景，股市又已由低位累積一定升幅嘅情況下，惟有勸班老友記捱住先，悶得滯就湊夠一台人上網開局鬥地主！

尋日係驚蟄，恒指下跌296點，收報21,265點，成交579億元，真係好嘅唔靈醜嘅靈！翻查對上個節氣係喺二月十九日雨水，翌日恒指見高位21,760點，尋日股市又低收，走勢似係見頂回落，下一個節氣喺三月廿日春分，此前股市係咪會變天，即管等睇戲。

港匯顯示資金流出

阿莊手持嘅金威啤酒（00124）尋日高見3.27元，收報3.16元，升4.9%，成交2,770萬元，帳面利潤唔錯，心郁郁想沽貨。一直在講三月份股市現單邊行情機會大，本來諗住呢個禮拜先見頂後才回落，點知上大人口淡淡，打亂陣腳，A股尋日經已升唔起，再睇見港匯指數走勢顯示有資金流走，惟有急轉軚，尋日先以平均價每單位11.8元沽出A50（02823）十萬個單位，獲利10.14萬元。

繼續留喺股市嘅資金，最好盡量避開重磅股，免得淡友發功，持股會成當頭跌。從國策股出發，農業股當中，化肥股冇咩點炒過，其中中海石化（03983）股價尋日逆市上升，收報6.28元，升2.1%。

查實上周A股市場經已炒起甲醇概念股，主要係工信部表示，將會喺山西、上海以及陝西開展甲醇汽車試點工作，目的係要推動新能源汽車市場發展，直接受惠嘅當然係新能源汽車生產商以及甲醇燃料生產商。

甲醇正係中海石化嘅主營業務之一，去年上半年相關嘅銷售額16.96億元人仔，分部除稅前利潤6.59億元人仔，甲醇產量為82.1萬噸，而期內全國國內甲醇產量約970萬噸，進口量則為286萬噸，二者同比增幅均超過兩成。

隨着政府推廣甲醇汽油，有望進一步提升甲醇作為替代燃料嘅需求，公司處於有利位置。不過，考慮到試點成效須時展現，買貨唔使心急，6元邊分注收集，支持位喺5.5元，中線睇7元。

Tip股我至Top

暴炒男（2/29）Tip華油能源（01251）最多升16%

史提芬（2/28）Tip青蛙王子（01259）最多升13%