樓市出更:大款復出周圍掃貨
舊年第四季樓市表現麻麻,連內地客都忍手唔入市。不過,隨着最近小陽春出現,北水最近又再湧入二手市場,好似一向受內地客歡迎嘅北角區,最近就有該類買家大手以約3,600萬元,連掃豪廷峯3個單位。
世紀21北山嚴智贇話,北角區近期又多番啲內地客入市,好似上述投資者用約3,600萬元買入3個豪廷峯單位,每個面積介乎765至1,133方呎。其中一個2座極高層C室,成交價約1,500萬元;另外兩個同座極高層E室及中層D室,成交價分別約1,320萬元及780萬元。劉Sir聽聞,豪廷峯一向受內地客追捧,其中有個福建業主,更加持有至少5伙收租。
內地客買嘉亨灣收租
西灣河嘉亨灣亦係另一個受內地客歡迎嘅樓盤。美聯曾偉民稱,有個內地嘅長線收租客,近日以約662.8萬元,連約購入嘉亨灣6座中層E室,面積約698方呎,料租金回報約3.5厘。中原另稱,同屋苑3座高層D室,獲投資客約1,850萬元買入。
美聯張卡迪稱,九龍站擎天半島5座有個低層連平台單位,最近由一名內地客喺無睇樓情況下,即以約1,120萬元購入,呎價約1.3萬元,若果用市值租金約3.3萬元計算,租金回報率約3.5厘。
香港置業何永光稱,最近長沙灣西九四小龍內地客比例增加,其中有兩組內地客喺區內物色樓價約1,200萬元以下、面積較大嘅海景物業,諗住買入作投資或留港住所。事實上,四小龍樓價較九龍站及奧運站低,亦是吸引內地客轉投嘅原因。
而藍籌屋苑亦見內地客足迹,中原柳發利稱,馬鞍山新港城3期R座高層3室,以275萬元賣出,買家係內地客,估計收租回報利率約3.9厘。
位處北角半山的豪廷峯向來受內地客追捧。