Fundman睇市：港交所估值嫌偏高

人民銀行連續九星期停發央票，變相放水，一個月上海同業拆息落到4.46厘的春節後新低。上周五，滬綜指升35點，收2,461點，刺激上周四跌近300點的港股，拗腰升174點，收報21,562點。不過，愈近22,000點，港股波幅有愈玩愈縮之勢，恒指周五高低位差距得92點，恒指波動指數跌0.96，去到20.67的七個半月低位，大市橫行待變，等突破行單邊市的味道愈來愈濃。

上星期，歐洲央行二輪長期再融資操作（LTRO），合共為800間銀行提供5,295億歐元貸款，兩個數字比上一輪的523間及4,890億歐元，分別多52.9%及8.2%，拆出的銀碼係就係高過市場預期。然而，兩日之後歐央行公布數據，各銀行泊入的隔夜存款，由3,000億歐元飆升至7,769億歐元，創下歷史新高，1厘息借錢返黎，泊入央行收番0.25厘蝕息都肯，意味銀行只係唔想執輸，攞咗至算，但借錢出街或者互相拆借的興趣仲係極疲弱，歐央行如果無辦法解決銀行之間互相不信任的情況，即使再搞三輪LTRO，效果都只會泥牛入海，實際幫助唔大之外，心理刺激亦會一次細過一次。

業績未有帶來驚喜

港交所（00388）去年賺50.93億元，微升1%，同分析員估計的47.5億至55.3億比較，算中間落墨，無太大驚喜，計及末期息2.09元，全年每股派4.25元，以143.1元股價計，股息率2.97厘，市盈率30.2倍，假如用公眾的抵買標準，PEG要達1倍水平，粗略計，日均成交額要從去年695億，升到850甚至910億，以目前大市平淡的交投來看，真的要等奇迹出現。事實上，業績後的研究報告顯示，大行對一二年日均成交預測，只係介乎650至750億元，如果是這樣，港交所估值感覺頗貴。

港交所顯然也有自知之明，去年明顯在硬件上作出更多投放，包括拓展數據中心、託管服務、場外衍生產品結算所、拓展商品交易平台。另外，令到經紀大佬們怨聲載道的二輪延長交易時段今日開始，希望刺激「賭客」落注。

行政總裁李小加提出，今年更多國企的非流通股「解凍」，轉為H股會有助刺激港股交投和提升總市值，開拓11萬億元非流通股市場對交易有刺激作用。然而，由內地A股非流通股解凍後，極低的交易比率數字（估計同解凍始終由國有機構持貨有關）看，這方面能夠提供多大的生意？似乎同延長交易時段刺激交易一樣，理論可行，實際改善有待觀察。

港交所賺錢能力，同大市交投氣氛息息相關，可能今年太多投行睇淡港股表現，業績公布後，由彭博資訊統計數字所見，給予正面評級，建議買入、增持或跑贏大市的，十七中僅佔五間，大部分認為以目前大市交易金額計，估值已偏高。

睇番港交所歷史市盈率變化，淡市可見20倍樓下，次按風險時甚至去到11.4倍。相反市旺時，像一○零年高峰期，可以去到42倍，對照刻下的30倍左右，有食之無味之感，想做這半獨市生意小股東，或者惟有等待更淡靜兼悲觀的市況出現，才有機會。