股海實戰：創科現價具重估誘因

上周好淡友尚未分得出勝負，阿莊維持相信三月份股市走單邊嘅可能性較高，暫看好友略處上風，皆因市場對於利淡消息嘅反應唔大，由資金推動嘅升市唔需要有好確切嘅理由，順勢跟炒唔驚得咁多，但謹記參加音樂椅遊戲，音樂終有一刻會停，唔想做冇櫈坐嘅輸家，最重要係量力而為，懂得嚴守止蝕嘅紀律。

過去每年三月上、中旬A股出現大跌嘅機會唔大，相信今年亦唔例外，滬綜指向上阻力喺上周高位2,478點，成功破位有勢上試2,500點嘅心理關口，向下10日線支持在2,421點。

內銀股首選農民行

本月內銀將陸續宣布業績，喺信貸成本維持低企下，估計去年度盈利可再一年保持雙位數增長，去年十二月以來板塊表現走強正好反映呢份預期。阿莊早前炒過中國銀行（03988），食胡價與現水平相若，暫未有翻兜打算，若然真係想買內銀，會考慮從農業銀行（01288）同民生銀行（01988）入手。

美國嘅經濟持續改善，雖然年初以來國際油價上升已令市場關注，但阿莊相信，今年係美國總統選舉年，奧巴馬要爭取連任，必要時自會出招應付油價上升嘅問題，今年美國經濟出現小陽春嘅機會仍大。由於美國樓價經已回落至頗低嘅水平，相信只要就業市場持續改善，美國人供樓負擔能力回升，以目前嘅低息環境，購房意欲將逐步回升，即使今年美國樓價未見大升，但新屋動工及市場成交會有改善。

咁睇落其實創科實業（00669）股價亦值得睇好，事關公司專營電動工具及地板護理產品，主銷北美洲等市場，美國經濟及樓市好轉，公司自可受惠。

屈指一算，創科股價自去年十月低位至今經已翻一番有多，上周五收報9.76元，單日升幅3.5%，成交7,302萬元。去年上半年，公司錄得純利8,000萬美金，同比增長72%，即使下半年食白果，估計全年仍可維持利潤，若以下半年純利較上半年減半計，即預測全年純利為1.2億美金，計落現價一一年預測市盈率約十七倍。

公司將於下周四宣布末期業績，除往績外，相信現價落場追入創科，更多嘅動力乃來自憧憬今年美國經濟將踏入金融海嘯以來最好嘅一年，從而利好公司表現，只要情況回復至去年上半年嘅水平，估計現價一二年預測市盈率唔夠十三倍，跟進仲有水位。博重估潮未完，年內股價目標重遊去年高位11.5元，上升通道底部支持喺9元。

Tip股我至Top

Sammi（3/1）Tip 瑞聲科技（02018）最多升11%

積奇（3/1）Tip 達進精電（00515）最多升10%