樓市出更：觀塘地廠掃貨等起動

近幾年工廈市況表現穩步攀升，而觀塘一帶嘅工廈受惠起動東九龍，區內工廈樓價升幅更見驚人，劉Sir知道最近有部分投資者對區內投資市況好有信心，所以買定啲地廠收租，好似最近有個投資者就用咗逾4,200萬元，連掃觀塘兩個地廠單位，回報率都有約莫3厘。

踏入二月中，整體物業投資氣氛轉旺，工廈地廠市道都掀起一陣升浪。美聯工商助理營業董事吳偉華話，有個投資者睇好起動東九龍計劃，對發展已成熟的觀塘區信心特別強，所以最近連環入市，包括買入海濱道151至153號一個連約地廠，個舖面積約2,989方呎，成交價約2,370萬元，呎價7,929元，依家租客係車房，現時租金回報率約3厘。

同時，個投資者又買入觀塘道472至484號一個面積約1,584方呎地廠，成交價約1,848萬元，呎價約11,667元，而個地廠現時租客做緊飲食業，租金回報率超過3厘。

由於市況持續向好，依家觀塘區有個別地廠意向呎價已近1.3萬元。吳偉華講，偉業街170號豐業工業大廈近期有一個面積約1,400方呎嘅地廠，就以意向價1,800萬元放售，呎價去到約1.28萬元。

「物流張」沽舖賺千七萬

除咗地廠外，近期各區舖市都唔錯，多個資深投資者都趁獲利出貨。投資者「物流張」話，啱啱以約4,200萬元連約賣出長沙灣青山道單號項目一個地舖連一樓，總面積約8,000方呎，現租客係地產代理及超市，持貨一年多帳面賺約1,752萬元。