Fundman睇市：大昌行候低執平貨

港股經歷超過廿年最強的一、二月份升市，基金成功保住高位月結，趁短期最後一個利好消息──歐洲二輪長期再融資操作（LTRO）出籠，港股尋日來個反高潮，恒指跌292點，報21,387點，前日廣泛流傳兩會將研究全國徵收房產稅的可行性，消息居然遲了一日才發揮藥效，內房股跌到一仆一碌，唇亡齒寒的建材股亦幾乎無一倖免。

二輪LTRO規模5,295億歐元，對比分析員預測的中位數4,700億歐元多，金融市場應該收貨，然而並唔代表歐豬財政問題一天都光晒。今年開始要勒緊褲頭減開支削赤，經濟低處未算低，尋日歐元區公布二月份PMI仲停留在49，德國更由51碌返去50.2，睇見都危危地。當市場焦點在二輪LTRO，唔知有冇人留意前晚葡萄牙及愛爾蘭國債息突破抽升，最後要勞煩歐央行入市買債，如果話尋日係歐央行最後一次變相量寬，真係打句問句都唔信。

QE3短期難寄望

前晚歐美股市高開低收，另一關鍵係聯儲局主席伯南克出席國會聽證會時，未有對市場期待的QE3作出明示或暗示。由陰謀論，距離十一月六日美國總統選舉，仲有八個月，剛剛美國第四季GDP修訂到增長3%，話就話庫存增加所致，但數字總算唔錯，加上美股升到去四年高位，美國人正開始feel good，聯儲局實在無必要咁快用埋僅餘彈藥。

經過前兩輪的驗證，證明了QE是兩面刃，○九年三月伯南克提出QE，用直升機掉錢落嚟開始，到一○年三月結束，標普五百指數由低位750點反彈57%，同期美國通脹由負0.4%推到去2.3%；至於一○年八月提出的QE2.0期間，股市升25%，通脹由1.1%升至3.6%。以筆者半桶水的大學經濟科知識去解讀，QE對股市刺激作用一次比一次低，可是對通脹的影響卻所差無幾，回顧美國一月份CPI有2.9%，如果立即再出QE3，美國通脹再升，距離聯儲局2%的目標將愈走愈遠。聯儲局職能以控制通脹為首，睇怕唔會因為華爾街炒家feel good，掉咗九十八年的金漆招牌。在短期內歐美放水有拖無欠下，環球股市的興奮期，睇怕點都要停一停。

大昌行（01828）去年賺13.23億元，按年跌7%，尋日股價大插1.51元，報9.47元。儘管數字上倒退係因為前年有一筆3.31億元的一次性收益，去年就無，但街外估全年盈利介乎14.54億元至16.31億元，以中期已賺8億元計，即下半年得5.22億盈利，難怪會通街眼鏡碎片。

據公司解釋，去年第四季內地汽車銷量放緩，是業績差過預期的元兇，今年第一季情況仍然麻麻。內地樓市及經濟被唱淡，大行對今年奢侈品消費都打定輸數。當然，筆者相信以大昌行近年在內地的表現，繼續交出高於整體汽車業銷售增長（市場估一二年只有單位數升幅）唔難，但街外預測今年要賺18.8億元，伸算42%的增長，似乎有調低的空間。保守點，如果交到16.5億元，市盈率10.5倍左右，仍稍高於歷史平均值9.5倍，想買這管理質素極佳的公司，看來可等等，短期有機會掂到9元甚至8.56元，與歷史估值睇齊。