股海實戰：融資股生意唔憂做

聯儲局伯老言論令投資者嘅QE3美夢成空，淡友把握機會反攻，恒指尋日應聲回落近300點，10日線得而復失。好淡角力愈來愈明顯，邊個手瓜夠硬，呢個月點都要分出勝負。

內地官方二月份製造業PMI為51%，顯示內地製造業經營情況有所改善，但能否成為一個趨勢就要再睇睇。近日有關房企政策嘅爭拗備受矚目，尋日官方傳媒發表專文，表明房地產調控容不得各種變相嘅「鬆動」，上海幫想博懵試水溫鬆綁嘅如意算盤打唔響。

尋日內房及建材股股價明顯受壓，由於三月份內房行業將進入償債高峰期，調控政策確認「鬆不得」，相信房企老闆又要頭痛撲水，這勢必再次拉緊整體市場流動性。咁嘅情況，也許可為專門從事融資服務業務嘅遠東宏信（03360）同中國信貸（08207）帶來商機。

遠東宏信穩陣之選

先講遠東宏信，主要向來自內地醫療、教育、航運、建設、工業裝備同印刷等行業的客戶提供融資服務，上月中旬曾發盈喜，預計去年純利按年增長超過55%。粗略估計其去年度純利可達1.6億美金，計落現價預測PE約十五倍，可視為穩陣之選。

至於喺創業板掛牌嘅中國信貸，規模較細，業務性質亦有點不同，皆因除經營房地產及其他有抵押品典當、委託貸款服務外，還兼營個人財產典當貸款服務。聽聞一對內地小情侶客戶想拉埋天窗，但只有一所父母剩落嘅房子而冇積蓄，深明結婚擺酒乃有利可圖之事，最終遂將房子抵押換來短期貸款擺酒，結果客戶如願得償，亦可見公司生意真係唔憂做。

中國信貸去年首三季生意額同比增1.4倍，至1.95億人仔，純利增1.2倍至1.05億元，利錢真係幾唔錯。公司去年成功配股同發人仔債集資，食正內地中小企錢荒放貸，大賺一筆。阿莊估計，為應付業務持續發展，公司會再尋求喺市場融資，若業績消息對辦，估值便宜（預測PE唔夠十倍）加埋轉板概念，炒高股價再吸水嘅可能性存在。公司將於下周一宣布業績，不妨（目及）實其股價表現，睇睇有冇機會快炒一轉。但要補充一句，呢個新興板塊，機會與風險並存，主要風險包括市場波動影響企業信貸能力，企業放貸政策以及行業監管趨向。

Tip股我至Top

黃瑋傑2/28Tip志高控股（00449）最多升17%

阿莊2/23Tip大成生化（00809）最多升7%