Fundman睇市：碧桂園再揸無着數

估佢唔到，悶足個半星期的港股，竟然揀期指期權結算日至嚟發威。道指前晚仲未企到13,000點樓上收市，港股早段表現唔突出，直到午後A股跌轉升，恒指發力升穿10日線21,416點後，升勢加快，最後升350點，報21,568點。假如加埋隔晚歐、美市場，滙控（00005）股價業績後的跌幅，昨日大市的升幅，得來不易，美中不足係主板成交甚奀，得624億，比前日仲少21億。收市後，內地傳媒引述房管局消息，話繼佛山及蕪湖後，再叫停上海居住證滿三年可買第二套房的措施，近期炒到飛起的內房股，睇怕都要停一停，抖一抖。

近期港匯貼實7.75強方兌換水平，熱錢完全無流走迹象，豬債息繼續回落，充裕的游資就係唔願畀股市狂牛靜落嚟。踏入三月業績期，市場有無心理準備面對去年下半年十分差勁的業績，抑或像火鳳凰浴火重生，業務最壞時刻過去，甚為關鍵。

滙控不宜寄厚望

尋日滙控及玖紙（02689）做了最佳示範，玖紙管理層拍心口業務見底復甦，股價立即升一成六。講到炒業績，史提芬成績只係一半一半，假如自問承受唔起大波動，最好都係等業績曝光至算。

滙控業績寫到爛，老實講，提高派息的確是市場意料之外，以4.6厘股息回報，若買樓收租怕煩，嫌兩電連4厘都無太奀，長期捧場客繼續揸住收息，問題唔大。反而係，持續偏低嘅股東資金回報，成本對收入比例也同目標愈走愈遠，跟分析員預期落差頗大。儘管滙控經已全力瘦身，以降低成本對收入比重，可是，如果在開源同節流之間揀，無疑開源才是正途，大笨象選擇銳意減磅，多少道出管理層對來年行業前景唔多睇好。如果今日至想買滙控，博會再出現○九年一樣的升幅，睇怕機會是微乎其微。

碧桂園（02007）派成績表，截至去年底止收入347億元（人民幣．下同），增長34.7%，確認收入建築面積590萬平方米，增長19.6%，純利58億元，升35.5%，貼近分析員預測的49.8至58.1億元上限，每股盈利35分，沒有中期息，末期息12.96分，以收市價3.66港元計，股息回報4.37厘。

去年碧桂園實現合同銷售金額及建築面積，分別為432億元及687萬平方米，比一○年增加31%及15%，高出管理層全年430億的目標0.46%，印象中，是幾年來超標幅度最少的一年。至於業績優於預期，驚喜地方包括去年財務費用減少46%，毛利率則由32.4%進一步改善至34.5%，淨負債比率由年中的66%回落至63%。

基於極大機會達到銷售預期，去年第四季建議買入碧桂園，至今累升近四成，升幅也是意料之外。按往績市盈率八倍，帳面值1.9倍，比較歷史平均值2.1倍，折讓收窄到一成左右，又或者較分析員重估後每股資產淨值折讓25%，僅次於中國海外（00688）及華潤置地（01109）等一線內房股。假如押注內地樓市今年減價潮會持續拖累內房股毛利表現，再揸碧桂園，值博率已經減低，就算掉轉頭認為樓市調控快到尾聲，但看來亦應找折讓更大的中小型內房股埋手。