股海實戰：TCL通訊博財息兼收

仲以為期指結算，淡友終於落刀，點知前晚美股表現又唔係太差，好友隨即借勢反擊，尋日恒指話咁快收復21,500點水平，收報21,568點，升350點，成交626億元。仲記得術數師傅話三月五日驚蟄後股市會轉勢，準唔準就要拭目以待！

大笨象（00005）公布業績後股價受壓，股價跌0.65%，收報69.15元，但恒指最終仍能倒升逾三百點收場，主要係同系恒生（00011）派息叫市場滿意，股價升逾半成，加上本地地主股偏強，以及中資金融股反彈。基本上，藍籌股除大笨象同聯通（00762）之外，其他全部報升收市。講到聯通，阿莊都講過今年中資電訊股焦點已由聯通轉移至中電信（00728），若想作中線持有，應該從後者入手。

奶粉股有留意價值

其他板塊方面，油價回落，中資航空股升幅介乎2至5%，另兩隻藍籌食品股康師傅（00322）同旺旺（00151）分別升3至4%。想發掘炒作新焦點，可以睇睇奶粉股。事緣消息指部分知名海外奶粉品牌將會喺三至四月將零售價提高逾一成，以應付成本壓力，相信本土奶粉唔多唔少都會跟住加價。目前奶粉股有澳優乳業（01717）、大慶乳業（01007）、雅士利（01230）等，論人氣大慶乳業較可取。

從事手機製造業務嘅TCL通訊（02618），最近宣布去年度淨利潤7.99億元，按年升13.9%，期內毛利率持平，維持喺22%。老實講，呢隻股由去年高位9.47元，回落至十月低位僅2.48元，公司又唔係冇錢賺，咁跌法實在離譜，反彈係好自然嘅事。尋日受業績消息刺激，股價一度高見4.39元，收報4.36元，升13%，成交1.57億元。

無可否認，手機市場競爭激烈，款式改朝換代快過打針，必須要維持相當嘅研發及產銷能力始能應付。睇番去年TCL通訊嘅經營表現，雖然冇去年上半年時預期般好，但說到底全年數據又唔係咁差，現價一一年度市盈率六倍，雖然末期息減11%至每股15仙，但全年派息增加16%至28.8仙，息率有6.6厘，橫睇豎睇估值都唔係貴，若依照公司業績所言，有信心今年維持增長勢頭，咁計落現價估值應該係買而唔係沽，難怪尋日成交股數創逾半年高位，短線回吐守穩4元樓上，可考慮小注博財息兼收。

Tip股我至Top

藺俠（2/22）Tip

海油滙豐購（13241）

最多升19%

姚午齊（2/24）Tip

國美（00493）

最多升9%