投資酒店好過買樓掃舖

本港旅遊業發展蓬勃，唔少財團都睇好酒店發展，令最近市場全幢酒店交易增加。劉Sir參考高力國際一份報告，原來舊年投資酒店回報有4至4.5厘，比起住宅、寫字樓同埋商舖錄得嘅2.3至3.3厘贏足成條街，酒店房租更按年升咗16.3%至平均一晚1,538元，當中中價酒店升21.1%最勁，預期今年仲可以升多一成。

高力國際盧永輝同劉Sir講，舊年訪港旅客人數按年增16%至4,200萬人，創新高，預計今年再升約5.5%，所以酒店房租仍會上調。佢話舊年投資酒店回報率有4至4.5厘，跑贏寫字樓及商舖市場，相信投資者將轉向投資酒店。

酒店成交 65%購作營運

佢仲拎香港旅遊發展局數據解釋，酒店房租舊年每晚約1,538元，按年增約16.3%，內地個人遊數目持續增加，刺激房租約800元嘅中價酒店租值上升，去年就錄到21.1%升幅。估計今年中價酒店房租再升約一成，反觀五星級高價酒店升勢料少於5%。

近年酒店供應亦一直上揚，該行指出，本港酒店房間由○三年38,133間，累升約58.5%至去年嘅60,428間，但入住率仍錄超過九成並幾近全滿水平，房租無受供應影響而減少。

該行胡孝直亦同劉Sir講，其實投資酒店持貨成本較重，因為房間往往隔一排就要翻新，營運花費較大，但酒店市場發展很大程度取決於旅遊業發展。最近多項酒店成交個案裏面，約65%買家購入後用作營運，其他如基金等投資者就多會將酒店營運外判。

核心區周邊勝算高

劉Sir認為，投資酒店項目，梗係要揀番核心商業區啦。不過胡孝直建議投資者將目光放在核心區嘅周邊地帶，好似上環、北角或尖沙咀邊緣，一來配套較完善，二來鄰近購物熱點。