股海實戰:長城汽車強勢有道理

尋日係大笨象(00005)公布業績日,港股唔再呆若木雞,恒指先輕微低開,然後抽上全日高位21,589點,下晝倒插落21,000點邊先至停手,單計大笨象跌幅相等於恒指跌40點,另建行(00939)、中行(03988)及國壽(02628)跌幅夾埋相等於恒指跌57點,結果恒指收報21,217點,跌189點,但成交冇大變化,僅648億元。

本來,有番啲波幅,炒家應該高興,但唔知係唔係大家一路都驚緊大跌浪來臨,「逃生」意識較強,故一有風吹草動,沽貨唔手軟,尋日上晝升得好哋哋嘅板塊,下晝都走樣,至於近期炒高唔少嘅二、三線股,亦普遍出現回吐。不過,經驗告訴阿莊,當大家都知驚,就證明未到最危險嘅時候,且看期指結算後,大市走向會否轉趨明朗。

上周六同班芬佬下午茶,聽講近日金融圈盛傳一位前中證監高層疑涉逾百億貪款而被雙規,係真係假不得而知,但就會密切留意一旦消息屬實,A股會有咩反應!尋日滬綜指上過2,478點,但其後升幅亦收窄,收報2,447點,升0.3%。

金威啤酒好事近

組合持有嘅金威啤酒(00124),聽聞出售啤酒製造資產好事近。尋日有內地傳媒報道,金威有八個啤酒廠房,即使出售其中六至七個,都經已可賣得半百億元人仔,而金威目前市值為48億元。阿莊揸呢隻股雖然唔係贏好多錢,但勝在證明當日認為其資產有價但股價未能反映嘅睇法無誤,滿足感比賺錢更大,至於話隻股賣完資產後,應該值幾錢,就要睇大股東日後點利用個殼做新業務。

個別汽車股尋日有炒味,主要係工信部發布《2012年度黨政機關公務用車選用車型目錄(徵求意見稿)》,其中涵蓋25家企業共412個車款,全部係國產車,外資同合資企業嘅車型無一入選。消息對主力經營自有品牌嘅內地車廠有利。

擁有「長城」品牌嘅長城汽車(02333),除咗過去曾入選嘅SUV、卡皮車型外,今次連轎車亦入圍,難怪尋日股價走高,全日高見15.4元,乃上市以來新高,收市仍升5.5%,報14.96元,成交2.51億元。

初步估計,每年內地公務市場嘅採購額達到一千億元人仔,能在當中分一杯羹,盈利自然有保證。但當然,目錄定期更新,能否每年都取得公家定單,要睇產品質量同環保要求。睇長汽嘅往績,呢方面可以放心,這亦說明其股價強勢有因。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

阿莊

工信部發布公務車選用車型目錄,全屬國產車天下,對長汽等擁有自主品牌的內地車廠有利。(資料圖片)