中環舖貨如輪轉搵水位

近排舖位投資氣氛熾熱,唔少投資者成功短線獲利沽貨後,再換入落後大市靚舖,其中以中環區最旺,好似資深投資者羅家寶繼早前一個禮拜內速沽威靈頓街地舖勁賺千萬元後,佢最近再夥拍友好斥約1.23億元再換入同區擺花街相連地舖,睇嚟佢哋係極度睇好中區舖位升值潛力。

近年中環舖位市場興旺,中原工商舖同劉Sir傾開,話羅家寶早前以約8,500萬元摸出威靈頓街一地舖,一周即賺千萬元;之後再夥拍友好林清林等人,以1.23億元買入擺花街雙號相連地舖,個舖面積共約980方呎,呎價近12.6萬元。

據講,兩間舖租戶都係時裝店,其中一個舖每月租金約15萬元,租期至二○一四年;至於賣出該兩間舖嘅原業主,係陳姓荃灣區議員,喺○七年及○八年分別以約2,400萬元及1,130萬元購入上址,今次易手帳面獲利達8,770萬元,升值近2.5倍。利嘉閣工商舖林彥釗話,同區威靈頓街單號地舖連一樓101號單號舖,亦以約4,150萬元沽,租金回報有3厘。

荃灣超市舖回報七厘

至於非核心區,因民生消費強勁,投資者都傾向長線收租,未肯割愛。舖位投資者物流張話,舊年年中買入嘅荃灣海濱花園平台B部分連地下等,面積各約1萬方呎及500方呎,以每月租金9萬多元租予超市,租期十二年,首三年租金回報7.3厘。另旺角廣華街13號地下1號舖,舊年中以約1,400萬元購入,剛獲食肆以約5.2萬元承租,租金回報近4.5厘。

金馬倫道地舖億六洽

佢透露早前以約8,800萬元摸出九龍城太子滙地下部分及1樓全層,買家為卡拉OK集團Neway或有關公司。另市傳理想集團持有嘅尖沙咀金馬倫道單號地舖,獲買家出價1.62億元洽購。

另外,車位繼續獲投資者追捧,利嘉閣話荃灣金熊工業中心共89個車位,以約3,600萬元沽出。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

劉Sir

中環擺花街相連地舖以逾億元成交。

羅家寶早前沽出威靈頓街地舖,勁賺千萬元。