短炒倉：博士蛙 強勢未見頂

時光飛逝，話咁快又已經二月尾，農曆新年都過咗成個月。仲記得去年底，里昂以龍年多人生龍仔龍女為由，出報告推介四大龍B概念股，分別係蒙牛（02319）、恒安（01044）、博士蛙（01698）同青蛙王子（01259），今日睇番，由舊年最後一個交易日起到尋日收市計，除咗恒安錄得跌幅之外，其餘三隻股升幅介乎18%至50%，所以都唔好話呢啲Gimmick嘢冇料到。

今年累升接近五成

四隻股中，當日志強揀咗青蛙王子，如今看來選擇正確，今年累升50%，但博士蛙都唔弱，升48%，只輸一個身位。其實論質素，主攻內地兒童服裝、鞋具及日用品市場嘅博士蛙真係唔差，去年上半年度盈利升11.9%至1.3億元人民幣，毛利率更高見44.3%，可見細路仔生意真係好做。志強當時唔揀佢，只係因為博士蛙招股價為4.98元，但最低竟見過1.18元，潛水潛得深，怕佢蟹貨不少，但如今看來是諗多咗，皆因博士蛙股價愈升愈有，尋日再升4.4%，報2.59元，更有逾2,900萬股的大成交配合，比前日多近一倍，睇勢可向3元阻力進發，支持位2.4元。

博士蛙（01698）

阻力位：3.0元

支持位：2.4元