Fundman睇市：騰訊影子概念受追捧

周四，港股波幅得103點，大市基本上低開後，全日呆呆滯滯。存備金率減完、希臘燃眉之急解決，股市無新消息，恒指最後跌168點，收報21,380點，主板成交額縮到605億，是七個交易日以來最低。兩星期後，香港將實施第二輪延長交易時間，經紀們可趁最後兩星期，食番餐安樂茶飯。

短期消息炒得七七八八，下一波焦點乃本月廿九日歐洲央行推出新一輪長期再融資操作（LTRO）。溫故知新，去年十二月，歐洲央行在歐峰會後，提出將會推出二次LTRO，簡單講，係畀歐洲商業銀行以較低級別資產（包括歐豬債）作押抵，以1厘低息向央行借入平錢，結果歐洲包括歐豬債券的利率回落，意大利及西班牙債息更由危險線7厘樓上，回到今日5.53厘及5.03厘水平。水浸股市下，歐股全線死貓彈，德國股市在首輪LTRO曝光後，累積升了16.8%。

分析員最新預測，二輪LTRO規模介乎2,500億至8,000億歐元，萬一真係多過首輪嘅5,000億歐元，唔排除股市音樂椅遊戲仲可以玩多陣，焗住更多基金經理要risk on追火棒。但係睇番美國QE1、2，到預期會有3的經驗，打嗎啡止痛不過將問題拖延，市場對央行提供超級流動性的依賴會增加，有第三輪還可，如果歐央行選擇狠狠降低市場期望，股市震盪難免。

思捷業績引發重估

火鳳凰浴火重生的故事，在股市永遠係最令投機者着迷，思捷（00330）做咗個好示範，中期業績賺5.55億元，跌74%。睇番彭博資訊系統，分析員老早對思捷死晒心，搵唔到幾多間大行有做中期預測。不過，全年估計數字介乎1.29億至5.78億，換句話半年業績已達到全年目標的96%甚至3.3倍，小插曲係昨午兩點半的管理層解畫會，分析員及賓架證實經營邊際利潤比公司年初指引的1至2%高一大截，去到4.7%，股價隨即「抽多一浸」，最後升3.56元，報17.78元。基於聽完解畫後去㩒掣的賓架唔少，睇怕今日應該有唔少報告要大幅修訂預測。

今年Facebook上市，連鎖反應係美國加州突然多了超過一千個百萬富翁，多數係面書一眾擁有認股權的員工。另外，創辦人朱克伯格，單係佢○五年獲發的一批認股權行使，估計上市後便要交20億美元入息稅，窮到燶的加州政府，真係多得佢唔少。

市值1,000億美元，全球用戶接近8.5億的面書，上市會唔會掀起社交網站的炒風？種種原因，在中國社交網絡發展上，面書及不上騰訊（00700）微博及新浪微博，也視兩者為內地最大對手。成功融資後會是帶來競爭、直接收購對手抑或尋求合作，騰訊及新浪股東需要留意事態發展。

今年騰訊股價走勢唔錯，年初至今累升28%，與其說炒影子股概念，近日唔少大行對騰訊提升微博的投資，和新浪抗衡舉動投以正面評價，認為因此引致毛利下跌只屬暫時。在社交網絡服務商業化，及今年奧運年商機下，都令分析員重新睇好騰訊。其估值從來都唔平，過去五年歷史市盈率介乎17.7至51.1倍（正是京奧前夕做出），中位數30.8倍，現價一二年市盈率22.8倍，有面書上市及奧運年商機推動下，或者股價仲有向上機會，但要強調，騰訊只啱相當貼市的股民。