股海實戰：招金礦業升浪一觸即發

滬綜指企穩喺2,400點樓上，愈近三月初「兩會」會期，市場憧憬中央繼續推出各項刺激經濟措施嘅呼聲就愈高。尋日中國人壽（02628）股價逆市靠穩，收報24.35元，升0.21%。也許淡友一直未大舉發動攻勢，其中一個原因係未睇通A股走向。

「十二五」新材料規劃目標一出，旭光（00067）股價即炒高7%，重上2元收市。查實，同屬新材料股嘅仲有海東青（02228）、天工國際（00826）同思嘉（01863），若然隻旭光真係重見天日，其他幾隻都可以多加關注。

保利協鑫沽壓沉重

反觀太陽能股就冇咁好彩，事緣市場傳來德國當局將自四月起提前下調太陽能補貼，且降幅大於預期，保利協鑫（03800）首當其衝，股價挫5.8%，成交達8.7億元，沽空比率達30%。似乎呢隻股由去年十月低位1.67元反彈上3元樓上阻力甚大，14日RSI走勢已明顯轉弱，故不建議博反彈。

曾經喺○七年十月股價創下130蚊歷史高位嘅思捷環球（00330），去年九月股價落到唔夠1美元，傷盡唔少基金嘅心。經過半年休養生息，股價總算企穩，昨日派成績表盈利雖然大倒退，但優於市場預期，股價報復式反彈25%。但阿莊始終認為，下半年歐洲各國需要落實削赤，經濟難有大起色，思捷前途仍充滿未知數，除非去年成功撈底，否則都係做旁觀者為妙。

全世界都在發瘋咁印銀紙，幾時會爆煲，冇人知，阿莊都唔想知，諗掂今日炒咩股票仲實際！近年聽到唔少廠家朋友話，旗下內地廠房關得一家得一家，套現買物業又好、買股票，黃金也好，反正做廠冇前途，辛辛苦苦做埋賺個幾個百分點，唔夠應付人仔升值同工資上升，趁仲有啲揸拿，退一步海闊天空咁話！

阿莊都好多次提到，唔好揸太多現金喺手，為的就係怕眨值。黃金嘅保值功能毋庸置疑，去年底以來，金價已反彈一成，現價約每安士1,775美元。依照目前嘅形勢，相信今年會繼續係大漲小回格局。

正由於金價走勢向好，金礦股仍然係基金愛股。招金礦業（01818）專注做金礦業務，股價與金價走勢聯動性較大，去年次季股價先於金價見浪頂，過去一季在10至11元水平找到支持，上月下旬重現升勢，現價15.3元，挨近250日線15.5元，一旦突破16至16.5元阻力位，可確認新升浪開始，目標重遊去年高位19.17元，支持位在14元。

Tip股我至Top

暴炒男（2/21）Tip

國中控股（00202）

最多升12%

姚午齊（2/20）Tip

英皇鐘錶（00887）

最多升11%