魚缸Blogger：金山軟件睇3.9元
港股已經連續第三日收喺周初裂口頂部樓上，情況同上周初醞釀衝破250日線非常相似，加上尋日嘅走勢繼續先低後高，相信大市要再上層樓只係時間問題。
阿里巴巴（01688）宣布獲母公司高溢價提私有化，刺激科網股尋日走高，當中不妨𥄫實初現突破嘅金山軟件（03888）。雖然金山軟件舊年頭三季業績差強人意，但主要受累新遊戲測試周期延長嘅一次性因素，加上公司穩坐內地網絡安全市場第二把交椅，且舊年獲騰訊（00700）高價入股，而「十二五」期間亦會加強扶持高技術服務行業，基本因素唔曳。尋日股價初試啼聲，突破月初高位，可睇3.9元阻力位。
金山軟件（03888）
阻力位：3.9元
支持位：3.3元