Fundman睇市：內房股未宜開心太早

周三港股低開高收，全日升70點，報21,549點，恒指開21,339點後，大約以每小時40點的龜速，逐步由低位收復失地，若果無參與二三四線及蚊型股炒作，睇住個指數隨時悶到瞓着。

客觀睇，人行減咗存備率，希臘獲援助避過一次違約危機，再數落去，可以見得到的利好消息，得番歐洲央行月底推出的二輪長期再融資方案（LTRO），但睇見首輪4,900億歐元的熱錢，歐洲銀行根本唔敢亂放出街，停泊歐央行內資金創紀錄新高，銀行情願蝕息都唔敢博。

近期，分析員開始下調對LTRO 2.0規模的期望，由月前的8,000億至1萬億歐元，到今日的4,000億至6,000億歐元，到底對股市好定唔好？要睇股市點樣解讀。LTRO萬一數字遠高於預期，對市場將有正面刺激，然而，希債危機成功拆彈歐股無歡天喜地，相反有小小反高潮，意大利十年期債息去到5.5厘附近亦抗絕再跌，股債市對LTRO的興奮有退燒迹象，股市要繼續升，無疑要搵過其他元素去推動。

港股基金跑輸恒指

好消息出得七七八八，筆者覺得大市是時候來個健康整固，可是，認識的基金經理出奇地個個雄心萬丈，搞到飯局上史提芬都唔敢表明立場，免得掃大家興。唔少股民以為基金經理必定係穩賺不賠，將散戶當點心，但實情卻是兩碼子的事，尋日上網搵港股基金今年表現，能夠跑贏恒指升幅16.9%的，只係得26%，事實話畀大家聽，人工高唔代表投資能力一定高，長遠計買指數基金，像盈富（02800）一類反而可以慳到管理費。

阿里巴巴（01688）大股東提出以每股13.5元現金，較停牌前溢價45.9%將阿里巴巴私有化，出價等於○七年招股價，有人話大股東有良心，不過五年投資得個吉，仲通街傳大股東已經搵投行部署緊一至兩年內，結合手上最賺錢的淘寶及淘寶支付系統一併上市賺一筆，唔知小股東有咩感想？私有化消息刺激下，阿里巴巴急升3.95元，收報13.2元，接近24億元成交額，據知唔少基金大手買來套息，以收市價計四個月執2.27厘，等於年息大約6.8厘，計及融資及使費，睇嚟只有交易成本低的基金有條件去連汁都撈埋。

上海傳媒報道，非居民只要有三年居留紀錄，便有權買第二套房，唔少大行緊張消息，尤其先後有佛山及蕪湖偷步救市被叫停。上海政府回覆賓架指今次並非新政策，有趣是唔單止內房分析員唔知，就連唔少上海物業中介公司都唔知，妙絕。

美銀美林估計新政會令5%非本地居民，合共67萬戶，釋放300萬平米購買力。到底今次係咪中央對樓市轉向鬆手態度？更以一線城市上海作試點？三兩日內官方回應，應水落石出。睇番內房股所發債券息率，從去年十月初高位回落甚速，恒大（03333）一六年債由32厘回到尋日14.1厘，雅居樂（03383）由16.6厘回到10.5厘，精明企業債投資者，早着先鞭由去年的擔心爆煲到今日怕執輸行頭，股市借上海政策轉向來個「舊聞新炒」，變得合情合理。但係，舊年第四季銷售奇差，今年上半年亦難睇好下，能否炒到三月底業績期，筆者卻是抱有懷疑。