樓市出更：甲廈鬥減租劈到尖沙咀

歐美經濟走勢未明朗，好多分析師都話寫字樓租金今年無運行。繼港島中區早前有多宗低租個案之後，九龍核心商業區嘅尖沙咀，亦難獨善其身。有代理同劉Sir講，今年以來，尖沙咀主要甲級商廈平均呎租跌至約30元，按月插水超過6%；其中指標商廈康宏廣場，有一個低層單號室租金半年間累減大約兩成後，啱啱以每方呎23.5元租出，創該廈三年新低。

外圍經濟數字認真麻麻，好多大公司都唔諗住擴充，本港唔少商廈租金升勢即刻停晒，除中環核心商業區外，尖沙咀開始有業主劈租及低租個案。

東海低市價15%租出

睇番美聯商業及市場資料，本年至今，尖沙咀甲級商廈平均呎租大約30元，同舊年第四季各月平均呎租約32元，縮水超過6%，並跌返去舊年五月水平。

有代理報料，康宏廣場近排連錄多單大幅減租成交。上述低層單號室，面積約1,400方呎，業主放租半年，原本諗住每方呎近30元放租，由於市場問盤唔多，之後多次減租，早幾日以每月約3.29萬元租出，呎租只係23.5元，創該廈三年新低。

由於尖沙咀唔少商廈業主都想盡快租出單位，所以喺租金上都可以傾。消息稱，東海商業中心低層單號室，面積約1,800方呎，啱啱以每月約4.27萬元租出，呎租唔使24元，比市價低約15%。

東九新廈搶走租客

美聯商業黃璜同劉Sir講，近幾年九龍優質商廈租賃市場焦點，落入觀塘及九龍灣等東九新興商業區，相信原因之一係尖沙咀唔少甲級商廈樓齡都唔細，大部分已達二、三十年，設施未必滿足到依家班租客，因此，部分商廈業主為求突圍而出，都肯直接減價，如區內鐵路大廈高層全層，面積約1萬多呎，放租一個月唔夠，業主早前果斷地減租近9%即租出，月租約22.8萬元，呎租約21元。