股海實戰：安踏突破有待下半年

美股前晚休市，尋日港股缺乏方向，高位整固。希臘已順利獲得第二輪援助，中國領導人外訪繼續就協助緩解歐債問題釋出善意，表面上歐債危機暫得紓緩，好友要喺二月完結前再奮力一挾，並唔係冇可能，但畢竟上望水位有限，持貨者食胡與否，自己睇自己數，冇話可以贏盡！

呢期無論係落金魚缸、行街、搭車、睇戲、食飯，身邊的人都在談論香港阿一選舉。股友話，自前日有人宣布正式入閘後，尋日香港天氣驟變，雲霧乍現仲落埋雨，連個天都咁表現，真係命裏有時終須有！近日聽聞有外圍開盤賭藍籌地產股三月份表現，焦點係咩股份留返畀閣下自己諗，總之呢次選舉影響層面真係大到你唔信！

個股方面，數碼通（00315）宣布截至去年底止中期業績，純利4.75億元，增長48%，派發中期息0.46元，可以股代息。阿莊揸住嘅和電香港（00215）亦將於三月廿日宣布末期業績，照計唔會差，即管多坐一會。

內房暫無大跌之虞

指數高企，股仔趁機會開波炒一轉，升幅榜唔少炒股名字。至於中資股，內銀表現比想像中硬淨，內房股則見坊間唔少人想借貨沽空，點知市場貨源短缺，借貨息高，空軍暫難成氣候，咁睇落短線內房股會有調整，但未有大冧之虞。

論落後板塊，原來內地酒股已靜靜地起革命，銀基集團（00886）唔聲唔聲經已連升兩大棍，尋日尾市有買盤掃上，由7元邊抽到上7.35元，收報7.31元，升3.5%，記憶中乃近次大股東減持後首次炒上，照計可以跟番些少。

又睇吓業績股，安踏體育（02020）去年度營業額按年增20%至89億元（人仔，下同），純利17.3億元，增長11.5%，每股盈利69.37分，全年每股派息52分。基本上，盈利增長放緩喺市場預期之內，但唔少券商仍擔心，皆因市場存貨依然高企，今年上半年行業經營仍然困難。

阿莊早前亦曾分析過體育用品股，指今年上半年表現都難樂觀，呢個看法仍未有改變，畢竟整體業者經已開始減慢擴展分店步伐，甚而要削減分店數目，銷售影響尚未全面反映。只係，睇到安踏嘅存貨周轉天數同存貨水平，都算係同業中最好嘅，底子夠厚，有助其渡過行業調整期，現價市盈率既已落到單位數，相信今年首兩季股價會維持喺7.5港元至9.5港元上落，有波幅但冇升幅，真正大突破，估計最快要到下半年才有機會出現。

Tip股我至Top

積奇（2/14）Tip中國風電（00182）最多升16%

黃瑋傑（2/13）Tip志高控股（00449）最多升9%