樓市出更：愉景灣轉售原來最賺

樓價近大半年不停咁跌，搞到賣樓賺錢比例都跟隨下滑。劉Sir响地產代理嘅數據睇到，上個月市場錄到1,616宗已知業主買入價嘅二手私宅買賣登記，當中佔1,513宗帳面有獲利，獲利比例跌到得番93.6%，係十九個月嘅新低，比舊年十二月份挫1.3個百分點，同舊年四月高峰期獲利比例高達99%，差距更加高達5.4個百分點。

獲利比例下跌，主要係舊年十二月期間樓市交投淡靜，樓價下調，阻礙咗業主轉售物業圖利。劉Sir聽中原黃良昇講，上個月二手轉售獲利宗數最多嘅屋苑係天水圍嘉湖山莊，有32宗獲利，沙田第一城以25宗居次，將軍澳中心及馬灣珀麗灣各錄18宗，並列第三位。

愉景灣平均獲利65%

而十二個獲利宗數較多嘅屋苑之中，有八個屋苑全部個案都成功獲利，除咗鰂魚涌太古城同紅磡黃埔花園外，屯門大興花園同將軍澳中心上個月成交個案都全部有錢賺。該批屋苑之中，賣樓賺錢最叻，原來係愉景灣，上個月平均每宗賣出個案升值約65.1%，而將軍澳新都城平均獲利幅度都有64.9%。至於最遜色就係荃灣中心，平均每宗獲利幅度只係得43.2%。

四季名園明賺實蝕

講開賣樓賺錢，近排有一批幾年前入市嘅業主，趁最近市況好轉，寧願明賺實蝕走貨。中原王勤學表示，元朗四季名園翠巒大道單號屋，連花園、天台及車房，總洋房面積2,580平方呎，啱啱以780萬元賣出，呎價3,023元，間屋係業主喺○八年十月以764萬元同發展商買入，持貨三年幾，升幅約2%。若果扣除釐印費、代理佣金開支等使費，估計要損手。