股海實戰：中信証券不妨分注上車

中港兩地股市尋日一如市場預期般高開，恒指高開268點，見21,760點，成功回補去年八月嘅下跌裂口，可惜升勢一步到位，午後轉升為跌，結果收報21,424點，跌66點，成交708億元，表現略為遜色。究竟後市繼續大漲小回，抑或見頂回落，乃投資者最關心嘅問題。

屈指一算，恒指已由去年十月低位16,170點反彈34.5%，亦較十二月底收市點數18,434點升18%，幾時都可以找到調整嘅借口。尋日阿莊聽到芬佬線話，有熱錢開始流出港股，但當然呢啲資金規模大，流出唔會打鑼打鼓，而係緩慢有序，邊派邊減。要知道，呢次人行降完存備率，最快下次要到第二季中，加上班芬佬話，睇見近期香港阿一之位嘅選情激烈，都有啲擔心下月境況，此前都傾向減磅觀望。所以唔好嫌阿莊長氣，股海中人，好難話手上冇貨，但亦要審時度勢，有胡要識得食，追貨要量力而為。

或有利好政策出台

尋日阿莊亦唔手軟，以均價5.26元沽出短炒嘅美聯集團（01200），獲利4.5萬元；另以平均價29.25元沽出華潤創業（00291），獲利6.1萬元。不過，手持嘅A50（02823）就繼續持有，主要有見內地市場流動性改善，A股表現唔使睇得太淡，亦不排除季內尚有利好經濟政策出台。

講到A股，尋日一眾券商股有異動，申銀萬國（00218）、第一上海（00227）、海通國際（00665）升幅介乎2至4%，而份屬行業龍頭嘅中信証券（06030），股價亦曾高見17.38元，收報16.98元，升幅3%，成交1.37億元。

由於近年A股經歷漫長跌市，無論係內地券商抑或基金，舊年嘅收益都大不如前，新年前後已有唔少金融企業進行減薪，做好繼續對抗逆境嘅準備。之不過，柳暗花明，兩次嘅降存備率行動，說明中央落實「微調」，雖然唔會好似上次投放四萬億人仔咁大製作，但逐步放鬆銀根卻已成為大方向，只要一如領導人所講，中國經濟不會出現硬着陸，A股再度大跌嘅可能性基本上可以排除。

是故，除咗內銀及內險外，券商股亦具留意價值。中信証券貴為內地券商業一哥，去年十月掛牌以來，股價喺12至13元水平成功構建底部支持，上周五創掛牌以來新高。隨着今年以來A股交投持續改善，公司直接受惠，中線具投資價值。16元邊可分注上車，支持位喺15元。